Mearrádus lea sámediggeráđi árvalusa mielde.

Kent Valio virgáduvvo direktevran Sámediggái áigodahkii 01.11.2026-31.10.2032 ja su váldobargobáiki lea Sámedikki hálddahus Kárášjogas.

Silje Karine Muotka Árvu/Sámediggi

Sámediggepresideanta Silje Karine Muotka lea duhtavaš virgádemiin.

– Sus lea nanu jođihanhárjáneapmi almmolaš ja politihkalaččat stivrejuvvon doaimmain, ja dovdá bures sámi servodaga. Dat addá buori vuođu jođihit hálddahusa mas lea alla gelbbolašvuohta ja stuora áŋgiruššan min servodatdoibmii. Direktevra galgá bargat olles Sámedikki ovddas ja láhčit dili nu ahte álbmotválljejuvvon áirasiid mearrádusat čuovvoluvvojit, dadjá Muotka.

Čieža olbmo ohce Sámedikki direktevravirggi go ohcanáigemearri dievai borgemánu 3. b. 2026. Ovddit direktevra Inger Marit Eira-Åhrén lei virggis ovtta mearreáigeáigodaga, čakčamánu 1. b. 2020 rájes borgemánu 31. beaivvi 2026 rádjai.

Ilus luohttámuša ovddas

Kent Valio Åse M.P. Pulk/Sámediggi

– Anán árvvus go ožžon dán virggi, ja illudan veahkkin eará bargiide Sámedikkis bálvalit olles politihkalaš dási. Mun válddán badjelasas dán jođiheaddjebarggu vuollegašvuođain sámediggebargiid erenoamáš gelbbolašvuhtii ja gudnejahtán álbmotválljejuvvon áirasiid deaŧalaš doaimma sámi álbmoga ovddas. Mu vuosttaš bargun šaddá lohkat ja gullat buot politihkalaš diŋgojumiid ja bargiid cavgilemiid, dadjá Kent Valio.

Rekrutterenfitnodat Heia Nord-Norge lea veahkehan Sámedikki vuđolaš rekrutterenproseassa bokte. Bargui gulai kandidáhttaohcan, válljen, máŋga jearahallanvuoru, iskosat ja viiddis referánsaiskosat. Sámedikki váldoluohttámušolbmot leat maid čuvvon proseassa. Loahpalaš árvvoštallamis lea ráđđi deattuhan kandidáhta formálalaš gelbbolašvuođa, jođihanvásihusa, persovnnalaš iešvuođaid ja referánssaid.

Máŋggabealat duogáš 

Kent Valio lea Guovdageainnus eret, ja boahtá barggus Sámi allaskuvlla rektora seniorráđđeaddin. Valios lea bargovásáhus journalistan ja jođiheaddjin NRK:s olu jagiid badjel ja iešguđetlágan virggiin. 

Valio lei suohkanhoavdan, ja nu bajimus jođiheaddjin, Guovdageainnu suohkanis áigodagas 2015-2023. Sus lea nanu gelbbolašvuohta sámi gielas ja kultuvrras, ja son dovdá bures politihkalaš eanadaga Sámis.

Lávdegottis Sámedikki direktevrra virgáibidjamii leat miellahttun:  

• Anne Henriette Nilut (NSR) (jođiheaddji) 
• Henrik Olsen (NSR) 
• Aili Kirste Strømeng Arntzen (NSR) 
• Ulf Tore Johansen (NKF) 
• Hilde-Kathrine Nilsen (NKF) 

Fáktádieđut Kent Valio birra:  

• 54 jahkásaš, Guovdageainnus eret. 
• Ovddeš suohkandirektevra Guovdageainnus (2015-2023) 
• Mastergráda jođiheamis Handelshøyskolen BI:s ja cand.mag. servodatfágas Bådåddjo allaskuvllas 
• Máŋggabealat jođiheaddjeduogáš NRK:s
• Davvisámegiella eatnigiellan
• Lea earret eará bargan iešheanalis ealáhusdoallin, riikkaidgaskasaš koordináhtorin Internašunála Sámi Filbmainstituhtas ja Sámi allaskuvlla rektora seniorráđđeaddin.