Duođalaš bivdoearredilli mearrasámi guolástusas

Duođalaš bivdoearredilli mearrasámi guolástusas

Stuorradikki Bearráigeahččan- ja konstitušuvdnakomitea doalai duorastaga golggotmánu 8. b. gulaskuddama riddo- ja áhpebivddu bivdoearrevuogádaga birra maid Riikarevišuvdna lea iskan. Sámediggi searvvai gulaskuddamii.

- Vealtameahttun deaŧalaš lea sihkkarastit mearrasámi boahtteáiggi, dan bokte ahte stuorát oassi guolleresurssain (bivdoeriin) addojuvvojit fatnasiidda mat bivdet ja buktet varas sállaša vuostáiváldiide rittus ja vuonain, dadjá sámediggeráđđi Silje Karine Muotka (NSR).

Sámediggeáirras Ronny Wilhelmsen (Bb) deattuha ahte riikarevišuvdna ferte čuovvulit iskkadeamis lasseiskkademiin sámiid guolástusrievtti birra. Son čujuhii bearráigeahččan- ja konstitušuvdnakomiteai ahte politihkalaččat lea ovddasvástádus fuolahit ahte bivdoearit juogaduvvojit rievttalaš vuogi mielde, ja ahte sihkkarastojuvvo ássan miehtá olles rittu.

- Iskkadeamis ferte čuvgejuvvot movt mearrasámiid bivdoriekti, oassin min kulturbarggus ja min historjjálaš bivddu vuođul galgá láhkanannejuvvot ja addit sihkarvuođa bivdoeriid oažžumis ja sullasaččain gozihan dihtii sámi kultuvrra ávnnaslaš vuođu, dadjá Wilhelmsen.

Sámediggeáirras Sandra Andersen Eira (NSR) čilgii komiteai man ollu kapitála dasa dárbbašuvvo, otnáš bivdoearrehattiiguin, háhkat sihkkaris fatnasa mas lea dohkálaš standárda, ja ahte dat lea mearrideaddji oassi vuođus mii dárbbašuvvo jos galgá sáhttit oažžut birgejumi guolástusas.

- Mii leat hui fuolas guolástusaide rekrutterema ektui, dadjá Andersen Eira (NSR).

Sámediggeráđđi Muotka čujuhii ahte Sámediggi lea váldán ovdan dan go bivdofatnasiid eaiggádat geahppánit ja guolástuslobit addojuvvojit dađistaga vánit gieđaide, ja ahte departemeanta ja guovddáš eiseválddit eai leat čuvvon čielggadusgohččosa.

Nu eai leat ge regulerenrievdadusat mat leat dahkkojuvvon dađistaga čielggaduvvon dahje politihkalaččat árvvoštallojuvvon. Dán geažil leat olbmot fárren eret, ja rittu álbmot lea báhcán dušše geahččat go stuorra fatnasat rábádit buot dietnasa ja guolleresurssaid dađistaga eanet ja eanet. Šaddá dađistaga čielgaseappot man deaŧalaš lea ahte sámit dál ožžot láhkanannejuvvon guolástusrievtti birgejumiset dihtii.

- Lea hui duođalaš dat maid riikarevišuvdna lea buktán albmosii ahte rievdadusaid submi bivdoearrevuogádagas lea buktán negatiivvalaš ja hui duođalaš váikkuhusaid guolástusaktivitehtii ollu riddoservodagain, dadjá sámediggeráđđi Silje Karine Muotka (NSR).