– Duođalaš jus CWD-dávda duođaštuvvo

– Duođalaš jus CWD-dávda duođaštuvvo

Sámediggepresideanta Silje Karine Muotka (NSR) fuolastuvvá Biebmobearráigeahču dieđu dihte ahte Byrkije guovllu bohccos lea fuomášuvvon positiiva CWD-iskkus álgoiskosiin. – Dát lea duođalaš, ja mii vuoruhit čuovvoleami hui bajás, dadjá Muotka.

Silje Karine MuotkaBohccos mii njuvvojuvvui čakčamánu 9. beaivvi Byrkijes, Nordlándda ja Trøndelága rádjeguovllus, lea álgoiskosiin fuomášuvvon CWD-dávda. Álgoiskosat čujuhit dan guvlui ahte lea njommojuvvon, ja eanet analysat fertejit dahkkot. Loahpalaš iskkusvástádus vurdojuvvo gárvánit vahkkoloahpas. Dan dieđiha Biebmobearráigeahčču preassadieđáhusas.

CWD (Chronic Wasting Disease)-dávda lea dávda mainna sarvvaeallit jápmet, ja dat lea ovdal duođaštuvvon gottiin Nordfjella-guovllus ja Hardangerduoddaris.

Sámediggepresideanta Silje Karine Muotka dadjá ahte lea mearrideaddji bissehit dávdaleavvama, jus loahpalaš iskosiin duođaštuvvo dávda.

– Jus duođaštuvvo ahte bohccui lea njommon CWD-dávda, de fertejit eiseválddit ovttas Norgga Boazosápmelaččaid Riikkaservviin (NBR) ja boazoeaiggádat geaidda dát guoská dakkaviđe kártegoahtit viidodaga ja doaimmaid bissehan dihte njoammuma, dadjá Muotka.

Sámediggepresideanta bivdá maid ahte boazodoallit ožžot dieđuid ja buriid fágalaš rávvagiid dan birra movt galget dahkat dákkár dilis.

– Lea dehálaš ahte diehtojuohkin vuoruhuvvo hui bajás, erenoamážit daidda boazodolliide geaidda dát guoská, muhto maiddái boazodollui muđui maid.

Sámediggepresideanta Silje Karine Muotka lea maid informeren ruoŧa beale sámediggepresideantta Håkan Jonssona vejolaš CWD-dávdda birra Byrkijes, mii lea hui lahka Ruoŧarájá.

Biebmobearráigeahču preassadieđáhus dan birra ahte várohit CWD-dávdda njommon bohccui Byrkijes