Stuornjárgga Sámiid Duodjie čállá ohcámisttis ahte sis lea ulbmil lágidit 4 iešguđetlágán duodjekurssa Dielddanuoris. Vuosttaš kursa maid lágidit 2023 čavčča lea riebansilbakursa, ja dasto maŋŋel dan niibedahkankursa. Boahtte jagi álggus galgá čađahuvvo sisteveaskokursa, ja 2024 giđasgeasi álggahuvvo veaddekursa. Kurssaid ulbmiljoavku leat earret eará nuorra duojárat.

Stuornjárgga Sámiid Duodjies lea ulbmilin ovddidit ja gáhttet duoji Ofuohtas ja Lulli-Romssas, ja bargat dan ala ahte bisuhit buori duodjekvalitehta.

- Sámedikki bealis leat hui movttegat go searvvit dego Stuornjárgga Sámiid Duodjie lágidit duodjekurssaid. Searvvit barget dávjá eaktodáhtolaččat, ja sámediggeráđđi áinnas doarju dákkár dehálaš kursadoaimmaid vai duodjemáhttu ovdána ja fievrriduvvo boahttevaš buolvvaide, dadjá sámediggeráđđi Berit Marie P.E. Eira (JSL).

50 000 ruvdnosaš doarjja juolluduvvo Duoji ealáhusšiehtadusa bokte – Gelbbolašvuohta, oahpahus, kurssat.