Hans Ole Eira
Åse M. P. Pulk, Sámediggi
Sámediggi ja Sámiid Duodji leaba danne ovttamielalaččat šiehtadallat guđiid rievdadusaid sáhttá joatkit ja ovdánahttit viidásit ođđa 1. kapihttalis. Sámediggi lea seammás šaddan ovttaoaivilii šiehtadallanbeliin Sámiid Duodji doallat vuosttaš dábálaš šiehtadallančoahkkima duoji 2024 ealáhusšiehtadusa birra miessemánu 4. beaivvi 2023 i Kárášjogas.
Sámediggi bovdii ođđajagimánu 27. beaivvi 2023 sihke Sámiid Duoji ja Duojáriid Ealáhussearvvi (DES) čoahkkimii váldošiehtadusa fátmmasteami birra ealáhusšiehtadussii ja DES válljii ahte eai oassálaste. Čoahkkin lei čuovvoleapmi dievasčoahkkináššis 034/22 Duoji ovttasbargu ja organiseren.
Loga dievasčoahkkinášši 034/22 Duoji ovttasbargu ja organiseren.
Sámediggi ja Sámiid Duodji leaba dál šiehtadallagoahtán ođđa 1. kapihttala duoji ealáhusšiehtadussii. Bealit leaba soahpan ahte šiehtadallamat ođđa 1. kapihttala birra váldojuvvojit ovdan sierra čoahkkimis njukčamánu 16. beaivvi 2023.
– Lea buorre go mii leat álggahan duoji ođđa ealáhusšiehtadusa šiehtadallamiid boahtte jahkái, lohká sámediggeráđđi Hans Ole Eira (Gb).
Son dadjá ahte buorre ja rabas digaštallan šiehtadallamiid birra lea dehálaš, nu ahte mii ain sihkkarastit ahte duodji seailu ja ovdánan sihke ealáhussan ja kultuvran. Sámedikki bealis lea leamaš sávaldat rievdadit šiehtadallanáiggi čavččas giđđii, mii buorebut čuovvu bušeahttaproseassa.
– Ovttasráđiid hálddahusain háliidit sirdit šiehtadusaid giđđii vai lea buoret vuođđu sihke buriid ja vuđolaš proseassaid čađahit jahkásaš šiehtadallamiin boahtte áiggis, lohká Eira.
Ovdal šiehtadallamiid lágiduvvo jahkásaš giđđačoahkkin njukčamánu 16. beaivvi 2023 Kárášjogas. Giđđačoahkkimis buktá Sámediggi earret eará ovdan ekonomalaš raportta, ja Sámeráđđi galgá fas juohkit dieđuid duodji-mearkka birra. Duojáriid Ealáhussearvi lea bovdejuvvon searvat giđđačoahkkimii ja ođđa ealáhusšiehtadusa ja ođđa 1. kapihttala šiehtadallamiidda.
– Sáhttá dieđusge válljet searvá go čoahkkimii vai ii, muhto mii Sámedikkis sávvat ahte Duojáriid Ealáhussearvvis lea vejolašvuohta oassálastit ja vuoruhit dán barggu, dadjá Eira.
Jus leat jearaldagat dahje dáhtut jearahallama, váldde oktavuođa sámediggeráđiin Hans Ole Eira, tlf: +47 918 61471, hans.ole.eira@samediggi.no