Duorga kulturbálgá rahpan

Duorga kulturbálgá rahpan

Sámediggepresideantta sáhkavuorru borgemánu 5.b. 2022.

Lea stuora illu beassat searvat dán Duorgga kulturbálgá allamenolaš rahpamii. Giitu Duorgga gilisearvái geat leat dáid doaluid lágideaddjit.

Kulturbálggis lea ovttasbargu gaskal Sámedikki, Duorgga gilisearvvi ja Evenášši suohkana. Várdobáikkis leat maid ožžon dehálaš doarjaga barggus.  

Dán bargui lea Geir Elvebakk Moski čehppodat báikkálaš historjá birra leamaš vearditmeahttun.

Máŋggas leat vázzán kulturbálgá dál, ja gullan Geira muitaleame dáppeguovllu historjjáid.

Lestadianisma lea fáttá man birra Geir lea muitalan. Lihkadusas lea leamaš olu dadjamuš, sihke dáppe ja eará sámi servodagain.

Go lestadianisma leavvagođii gaskamuttuin gávccinuppelotčuođi- logus, ledje sápmelaččat guhkesáiggi jo duolmmahallan, sihke kultuvrralaččat ja gielalaččat. Læstadius loktii sámegiela go sárdnidii sámegillii. Čoakkálmasain sámástedje. Lihkadus váikkuhii dáinna lágiin giela seailluheapmái.

Garra dáruiduhttin lea goitge dagahan ahte leat dušše moattes geat sámástit dáppe guovllus. Sámegiela ovddideapmi lea leamaš guovddážis kulturbálgá barggus. Sihke galbbat ja digitála teavsttat ja filmmažat leat sámegillii. Várdobáiki ja gilisearvi leat váikkuhan báikkálaš máhtolašvuođain, ja dahkan vejolažžan geavahit sámi báikenamaid.

Kulturbálggis lea guhki ja das lea buorre sisdoallu, ja čájeha iešguđetlágan beliid sámi historjjás. Kulturbálgá bokte fievrriduvvo Máhttu ođđa buolvvaide. Dovdat iežas sámi kulturárbbi lea dehálaš historjjá ipmirdeapmái ja dovdat iežas – jus galgá ipmirdit gii son lea.

Sávan ahte kulturbálggis geavahuvvo olu, sihke gili olbmot ja olbmuin geain lea gullevašvuohta gillái ja mátkkošteddjiin.

Sávan lihkku kulturbálgáin ja loahpahan divttain Áillohačča girjjis Ruoktu Váimmus

Dát visot lea mu ruoktu

Dát vuonat jogat jávrrit

Dát buollášat beaivvášat beaivvážat garradálkkit

Dáid duoddariid ija ja beaivvi bealli

Illu ja moraš

Oappát ja vieljat

Dát visot lea mu ruokto

Ja mun guottán váimmustan