Mátkki ulbmil lea oahpásmuvvat buorebut lulli- ja ubmisámi guvlui ja guovllu sámi kultur- ja giellaásahusaide/-organisašuvnnaide/-servviide, ja gullat ovdánahttinplánaid ja hástalusaid birra mat sis leat beaivválaš doaimmas. Lávdegoddi háliida maiddái eanet gulahallama lullisámi boazoeaiggádiiguin áigeguovdilis areálasisabahkkenáššiid birra boazoguohtunguovlluin.
Lávdegoddi galleda Snoase, Maajehjaevrie/Majavatn, Trovvegarse/Troforsa, Aarborte, Hïejmenaassjoe/Hemnesberget ja Muoffie. Snoases sii galledit Saemien Sijte. Doppe dollet sii maid álbmotčoahkkima eahkes borgemánu 13. beaivvi.
Lávdegoddi galgá maiddái galledit Sjeltie, Sijti Jarnge, Åarjelsaemien vierhtiesåafoe, Hemnes Umesamisk forum, Åarjelhsaemien teatere ja Aernie. Dasa lassin lea sis sierra čoahkkin Jillen-Njaarke orohagain.
Sámedikkis leat golbma fágalávdegotti mat ovddidit árvalusaid dievasčoahkkimii áššiin maid dievasčoahkkinjođihangoddi sádde lávdegottiide.
Ealáhus- ja kulturlávdegoddi bargá ealáhusdoaimmaiguin, nu go mátkeealáhusain, boazodoaluin, eanandoaluin, guolástusain ja bivdoeriiguin, lotnolasealáhusaiguin, oljjuin ja energiijain ja fievrridemiin ja infrastruktuvrrain. Kulturdoaimmat gullet maiddái lávdegotti bargosuorgái. Seammá guoská girkui, kulturmuittuide ja birasgáhttemii. Dasa lassin bargá lávdegoddi guovllupolitihkain, regiovdnaplánemiin ja ovttasbargošiehtadusaiguin fylkkagielddaiguin.
Sámedikki ealáhus- ja kulturlávdegoddi:
Jođiheaddji: Mathis Nilsen Eira, NSR
Nubbinjođiheaddji: Arthur Tørfoss, Ovddádusbellodat
Henrik Olsen, NSR
Ole Henrik Bjørkmo Lifjell, NSR
Sara Katrine Aleksandersen, NSR
Helén Storelv-Rabone, NSR
Svein Leiros, Guovddášbellodat
John Mathis Utsi, Ávjovári Johttisámi listu
Ulf Tore Johansen, Nordkalottfolket
Gry Hege Warth, Nordkalottfolket
Ingvild Halvorsen, Nordkalottfolket
Jørn Are Gaski, bellodatsorjjasmeahttun áirras
John Kappfjell, Bargiidbellodat