Ealáhusdoarjja njoammudávddaid eastadanbiergasiidda ja valáštallangávppi ásaheapmái

Ealáhusdoarjja njoammudávddaid eastadanbiergasiidda ja valáštallangávppi ásaheapmái

Sámediggeráđđi juolluda doarjaga Abanti AS:ii njoammudávddaid eastadanbiergasiid buvttadeapmái ja Kautokeino Sport og Fritid AS:ii valáštallangávppi ásaheapmái Guovdageidnui.

Abanti AS lea fitnodat Kárášjogas mii bargá dujiin ja bivttashábmemiin. Fitnodat lea háliidan buvttadišgoahtit ja vuovdit njoammudávddaid eastadanbiergasiid.

Sámediggeráđđi mearridii cuoŋománus doaibmabijuid main fokusis lea ealáhuseallima doarjun doaibmabijuiguin, prošeavttaiguin ja nuppástuhttimiin mat sáhttet váidudit vahágiid koronaroasu maŋŋel, ja bijai fokusa smávva fitnodagaide ja ovttaolbmofitnodagaide main lea nuppástuhttindárbu ja vejolašvuohta gávdnat ođđa márkaniid ja ovddidandoaibmabijuid. Abanti buvttadeapmi njoammudávddaid eastadanbiergasiin lea koronaguoskevaš ovddidanprošeakta, mii lea boađus das ahte designbivttasmárkan lea bisánan.

Abanti AS lei ohcan 250.000 ruvnno njoammudávddaid eastadanbiergasiid prošekteremii, hábmemii, ovddideapmái ja buvttadeapmái. Sámediggeráđđi lea mearridan juolludit 232.000 ruvnno. Doarjja addo doarjjaortnegis Máŋggabealálaš ealáhusat, lotnolas- ja meahcástanealáhusat.

– Dát lea doaibmabidju mas lea olu hutkáivuohta ja mii duođai ovddida fitnodaga. Márkanis lea stuora beroštupmi ja dárbu njoammudávddaid eastadanbiergasiidda, ja danne lea rivttes áigi dákkár vuoruheapmái, dadjá sámediggeráđđi Silje Karine Muotka (NSR).

Sámediggeráđđi lea maid mearridan doarjut Kautokeino Sport og Fritid AS:ii, mii ásahuvvui njukčamánus 2020 dainna ulbmilin ahte ásahit valáštallan- ja astoáiggebiergasiid gávppi Guovdageidnui. Gávppis galgá váldofokus bivdui, guolásteapmái, sabehiidda, sykkeliidda ja turistaduodjegálvvuide, ja rahpan lea 2020 čavčča.

Kautokeino Sport og Fritid AS lei ohcan 348.000 ruvnno. Sámediggeráđđi juolluda 167.000 ruvnno doarjjan Kautokeino Sport og Fritid AS:ii doarjjaortngegis Máŋggabealálaš ealáhusat, lotnolas- ja meahcástanealáhusat. Maiddái Ovddos, Guovdageainnu nuppástuhttinprográmma, lea dorjon prošeavtta.

– Guovdageainnus eai leat eará valáštallangávppit ja olusat mannet Áltái oastit valáštallanbiergasiid. Dát sáhttá mearkkašit ahte Guovdageainnu olbmot ožžot buoret gávpefálaldaga, dadjá Muotka.

Sámediggeráđđi Silje Karine Muotka (NSR) addá jearahallama ja vástida gažaldagaide, mob. +47 984 87 576, silje.karine.muotka@samediggi.no, dahje sámediggepresideanta Aili Keskitalo (NSR), tlf. +47 971 29 305, aili.keskitalo@samediggi.no.