Sámedikki ja Bivdu-ealáhusorganisašuvnna ávžžuhusa vuođul, almmuhii Guolástusdirektoráhtta mannan bearjadaga dan, ahte leat mearridan juohkit 8 tonnasaš maksimála earrelasáhusa fatnasiidda maiguin bivdojuvvo dorski riddoguolástanortnega siskkobealde, 62° D davábealde. Dát mearrádus doaibmagoahtá dalán.

Sámediggepresideanta Silje Karine Muotka lea duhtavaš go Guolástusdirektoráhta lea mearridan lasihit bivdoeriid.

- Mearrádus mearkkaša ahte fanasearri riddoguolástusortnegis lassána beliin, ja dan mearridedje vai beassat bures ávkkástallat várrejuvvon eriin dán jagi, dadjá Muotka.

Bivddu jođiheaddji Inge Arne Eriksen dadjá ahte dán jagi bivde liige árrat lasihit fanasbivdoeari, vai sihkkarastet ahte olles bivdoearri mii lea várrejuvvon adnojuvvošii bures.

- Mii leat ilus go Guolástusdirektevra vástidii dán mađe jođánit, ja go dás vásihat direktoráhta mii sihke guldala ja doaimmaha áššiid, dadjá Eriksen.

Sámediggepresideanta Silje Karine Muotka sávvá ahte boahttevaš vahkuid leat buorit dálkedilálašvuođat ja álki olahit bivdosajiide.

- Unnimus fatnasat ortnega doaibmaguovllus fertejit beassat sihkkarastit iežaset ruhtadili guovtti váttes dorskebivdoáigodaga maŋŋel, muhto mu mielas maiddái lea dehálaš váldit ovdan ahte dat maid dát bivdofatnasat buktet gáddái maiddái dahká ahte ollu smávva guolástusservodagažiin davvin leat doaimmat gáttis, loahpaha Muotka.