Emil Karlsena eadni, Juhan Hávvora Hege Risten (Hege Risten Karlsen) válddii vuostá Giellabálkkašumi, dá ovttas sámediggepresideanttain Silje Karine Muotkain.
Emil Karlsen
Katrine Opheim
Sámediggepresideanta Silje Karine Muotka (NSR) lohká Emil Karlsena ovdagovvan máŋgasii, go son čájeha ahte lea vejolaš oahppat sámegiela vaikko dat ii leatge iežas eatnigiella.
– Dat illudahttá mu go nuorat dahket diekkár aktiivvalaš válljejumiid ja mearridit áŋgiruššat giela oahppama ovddas, dadjá Muotka.
Dá lea njealját jahki go Sámediggi juohká giellaloktenbálkkašumi. Bálkkašupmi juhkkojuvvo ovttaskas olbmui dahje ásahussii gii ovddida sámegiela ja čalmmustahttá giela servodagas.
Emil Karlsen lea nuorra dáiddár ja artista. Jagi 2019:s nammaduvvui son dan jagáš Riddu Riđu nuorra sámi dáiddárin. Son álggii neavttáriin 2021:s ja sus leat leamaš máŋga rolla Beaivváš Sámi Nationálateáhteris.
Karlsenis leat ollu doaimmat, ja son lea máŋgga láhkai bargan sámegiela čalmmustahttimiin ja ovddidemiin. Son lea maŋemus jagiid oidnon ja gullon ollu mediain, sihke buvttademiid ja giellamátkkis dihte.
Vuoiti lea ovttas iežas joavkkuin ráhkadan musihka, muhto maŋemus jagiid lea maiddái okto buvttadan musihka.
Dán jagi bálkkašumi vuoiti lea Omasvuona suohkanis eret ja son ja su bearaš leat, nugo ollu eará mearrasápmelaččat, válljen oainnusmahttit ja loktet iežaset sámi árbbi ja giela.
Sámegielas ii leat dušše sáhka gulahallamis, muhto das lea lagas čanasteapmi sámi identitehtii, kulturárbái ja gullevašvuhtii. Sámegiella govvida min searvevuođa, min árbbi ja čanasteami min máttuide, ja gielain mii dovdat gullevašvuođa.
Dán lea Emil ovdanbuktán iežas musihka bokte. Son lea váldán ruovttoluotta giela maid sin bearaš lea massán stáda garra dáruiduhttinpolitihka dihte, ja lea rávisolmmožin oahppan sámegiela.
– Nu lea Emil Karlsen buorre ovdamearkan ja ovdagovvan dasa mot sáhttá váldit ruovttoluotta giela ja luođi maid ovddit buolvvat leat massán, ja válljet dan atnit vuođđun iežas bargoeallimis ja birgenlágis, dadjá sámediggepresideanta.