Maja Kristine Jåma
Åse M. P. Pulk/Sametinget
Sámediggeráđđi áigu lohkat raportta dárkileappot, muhto oaidná dál juo ahte lea unnán elrávdnjehuksema hástalusaid birra sámi guovlluin. Sámediggeráđđi ballá eanet báhkkema areálaide sámi guovlluin.
– Saepmie lea dađi bahábut šaddan vásihit hirbmat váikkuhusaid mat leat čuvvon stuora elrávdnjehuksemiid. Doaibmi energiijapolitihkka ferte sihkkarastit eamiálbmotvuoigatvuođaid, iige dagahit eanet olmmošvuođarihkkumiid, dadjá sámediggeráđđi Maja Kristine Jåma (NSR).
Sámediggi dohkkeha olles riikka dárbbu sihkkaris beassamii elrávdnjái dego vuođđun min ođđaáigásaš servodahkii. Seammás oaivvilda Sámediggi ahte elrávnnjeintensiverema heiveheapmi ii sáhte hehttet luondduvuođu sámi boazodollui ja meahccegeavaheapmái. Mii oaivvildit maid ahte ráđđehus ferte árvvoštallat elrávnnjeseastima dego seamma dehálaš doaibmabidjun energiijapolitihkas.
– Ođđa huksemat gáibidit ođđa proseassaid sámi beroštumiiguin ja vuoigatvuođalaččaid. Mii vuordit ahte daidda geaidda dát guoská njuolga sihkkarastojuvvojit návccat ja resurssat oasálastit mearrádusproseassain dohkálaš vuogi mielde. Sámi árbevirolaš máhttu berre maid vuođđun mearrádusaide, dadjá Jåma.
Sámediggeráđđi lea ovdal guorahallan ovdagihtii álgima huksenáššiin Oljo- ja energiijaministariin, ja oaivvilda ain ahte ráđđehus berre lagabui geahčastit Norgga našuvnnalaš olmmošvuoigatvuođaláhkaásahusa (NIM) rávvagiid árvvoštallama birra galgá go diktit hukset boazoguohtonguovlluin ovdal go lobit leat lágalaččat čielggaduvvon.
Gažaldagaid dahje jearahallama addá sámediggeráđđi Maja Kristine Jåma (NSR), +47 47 24 23 66, maja.kristine.jama@samediggi.no