Ealáhus- ja guolástusdepartemeanta lea sádden bargojoavkoraportta rabas joavkku ja mearrasámi guovlluid lasseeari birra gulaskuddamii. Sámediggeráđđi oaivvilda ahte maŋimuš jagiid ovdáneapmi dahká ahte dat 3 000 tonna dorski mii dál lea várrejuvvon lea váilevaš.  

​– Mii leat oaidnán mearkkašahtti lassáneami oassálasti fatnasiid logus, 2022:s ledje 460 fatnasa ja 2025:s ledje badjel duhát fatnasa. Dat iešalddis lea illudahtti, muhto go ovttaskas guolásteaddji earri lea unnon gávcci tonnas gitta golmma tonnii, de dat lea duođalaš. Dálá várrejupmi ii leat doarvái dasa ahte olbmot duođaid galget sáhttit ealli guolástemiin. Vástádussan ii leat gieldit riddoguolásteddjiid, muhto ahte stáhta lasiha ortnega dorskehivvodaga, dadjá sámediggeráđđi Jon-Christer Mudenia (NSR). 

​Ráddjen galgá vuođđuduvvat sámi geavaheapmái

​Sámediggeráđđi deattuha ahte earreortnega geográfalaš ráddjen galgá ovddemus vuođđuduvvat árbevirolaš ja dálá sámi geavaheapmái, mearrasámi ássamii ja guolástusa mearkkašupmái sámi kultuvrii ja sámi báikegottiide. 

Jon-Christer Mudenia Árvu/Sámediggi

​– Guolástanvuoigatvuohta ii galgga leat sorjavaš gieldda giellaválljemis dahje ealáhusovdáneami doarjjaviidodagain. Guovlu sáhttá áinnas šaddat eanet oktalažžan sihkkarastin dihte ovttalágan eavttuid oktasaš guolástushámmaniin, muhto sámi ulbmil ii galgga váidut. Ii oktage ortnegii juo gullevaš guovlu galgga báhcit eret, čilge Mudenia. 

​Ráđđi váruha maiddái ahte ođđa gáibádusat ássanáigái ja doaibmanáigái sáhttet dahkat váddáseabbon fidnet nuoraid searvái, dahje čuohcat sidjiide geat kombinerejit guolásteami ovdamearkka dihte eanandoaluin. Lotnolasdoallu lea buolvvaid čađa leamaš mearrasámi servodagaid geađgejuolgin. 

​Ođđa namma ferte oainnusmahttit riektevuođu

​Guovddáš gáibádus sámediggeráđis lea ahte «Riddoguolástanortnet» oažžu nama «Sámi guolástanvuoigatvuođaearri». 

​– Go mii gohčodit dan sámi guolástanvuoigatvuođaearrin, de mii čájehit čielgasit ahte ortnet lea huksejuvvon vuoigatvuođa- ja kulturvuđđui. Ortnet galgá ain gustot buot dohkálaš guolásteddjiide guovllus, beroškeahttá duogážis, muhto namma galgá speadjalastit ortnega duohta vuođu, lohká Mudenia. 

​Gáibida čuovvoleami riektečielggadeamis ja láhkaásaheamis 

​Sámediggeráđđi aiddostahttá ahte jahkásaš earrevárrejupmi rabas joavkkus lea dušše oasseulbmil, iige dat leat mearrasámiid guolástusvuoigatvuođaid loahpalaš čielggadeapmi. 

​– Dálá ortnet lea dárbbašlaš ja positiivvalaš doaibmabidju árgabeaivvis, muhto ii leat mihkkege loahppasárgáid. Sámediggeráđđi áigu ain gáibidit ahte stáhta kárte mearrasámi geavaheami maiddái olggobealde Finnmárkku, ja ahte mearrasámiid guolástanvuoigatvuođat viimmat formaliserejuvvojit lágaid bokte álbmotrievtti mielde, loahpa sámediggeráđđi Jon-Christer Mudenia. 

​Ášši meannuduvvo Sámedikki dievasčoahkkimis čakčamánu 24. beaivvi.

Loga áššeovddidusa: Ášši 043/26 Rabas joavku dorskebivddus – Ealáhus- ja guolástusdepartemeanttas bargojoavkoraportta gulaskuddan