Ođđa láhkaevttohus ii váldde vuhtii daid cealkámušaid maid Sámedikki dievasčoahkkin lea ovddidan Mohtorjohtolatláhkalávdegoddái ja sámediggepresideanta Silje Karine Muotka lea sakka fuolas láhkaevttohusa geažil.
– Dán rádjai dán láhkaproseassas lea leamaš váilevaš konsultašuvdna ja sámi perspektiivva vuhtiiváldin. Mii reageret go mohtorjohtolatláhkalávdegoddi ásahuvvui almmá ráđđádallamiid haga dahje ovddalgihtii proseassa haga Sámedikkiin, vaikke vel lágas sáhttá leat stuorra váikkuhus sámi diliide, dadjá Muotka.
Sámediggi ii ožžon vejolašvuođa konsulteret Dálkkádat- ja birasdepartemeanttain láhkalávdegotti mandáhta birra. Dat ahte sámi ovddasteaddji nammaduvvui referánsajovkui iige ieš lávdegoddái, ii leat leamaš doarvái mielde fuolaheamen sámiid árbevirolaš meahccegeavaheami.
Lávdegotti raporta dohkkeha sámi kulturdoaimmaheami mearkkašumi, muhto evttohuvvon láhkateaksta gáržžida kulturdoaimmaheami ealáhussan. Danne oaivvilda sámediggeráđđi ahte ođđa mohtorjohtalusláhkaevttohus gáržžida vejolašvuođaid mohtorjohtalussii eará sámi meahcásteami oktavuođas. Dát mielddisbuktá ahte sámi kulturdoaimmaheapmi hedjona, mii ollu guovlluin lea gitta das ahte lea vejolaš beassat árbevirolaš ávkkástallanguovlluide nugo bivddu, muorječoaggima ja guollebivddu oktavuođas.
Sámediggeráđđi oaivvilda ahte Sámediggi ii sáhte mieđihit láhkaevttohussii nu go dat dál lea, ja ahte ferte rievdadit vai sihkkarastá ahte láhka dávista riikkaidgaskasaš álgoálbmotriektái ja sámi riekteáddejupmái.
– Sámediggeráđđi árvala dievasčoahkkimii ahte Sámediggi ferte bivdit konsultašuvnnaid stáhta eiseválddiiguin sihkkarastin dihtii ahte sápmelaččat gozihuvvojit álgoálbmogin ođđa mohtorjohtolatlágas ja gáibida ahte evttohuvvon láhkateaksta rievdaduvvo. Dát lea erenoamáš deaŧalaš Duohtavuođa- ja soabahankommišuvnna raportta ektui, ja dan ektui go lávdegotti čoahkkádusas ja čielggadusas ii leat leamaš dárbbašlaš govdodat, gelbbolašvuohta ja legitimitehta sámi kulturbarggu ektui, dadjá sámediggepresideanta Silje Karine Muotka.
Sámedikki dievasčoahkkin meannuda ášši bearjadaga čakčamánu 27. beaivvi.
Loga áššebáhpiriid áššis 045/24 Sámedikki cealkámuš. NAČ 2024-10 - Motorjohtolatlágalávdegotti árvalus