Sámediggeráđđi lea dovddahan garra fuolastumi gierdanráji vejolaš rihkkuma dihte siviila ja politihkalaš vuoigatvuođaid art. 27 mielde, ja loavkida go vel stuorát sisabahkken sápmelaččaid kulturdoaibmama. Jåma ohcalii maid buori proseassa boahttevaš doaimmaid birra, ja fuomášuhtii ahte ii gávdno friddja, ovddalgihtii dieđihuvvon miehtan sámi vuoigatvuođaguddiin geaidda dát njuolga váikkuha.

– Dát leat guovllut mat juo vásihit olu báhkkema areálaide, sihke dálá ja plánejuvvon sisabahkkemiin. Danne gáibiduvvojit vuđolaš ja ollislaš árvvoštallamat Oljo- ja energiijadepartemeanttas go galget árvvoštallat ođđa doaimmaid, dadjá Jåma.

Sámediggeráđđi ohcala ollislaš jurddašeami oppalašnoađis sámi vuoigatvuođaguddiide go ráđđehus meannuda ohcamuša Muolkkuid elektrifiserema birra, ja ahte dát oktiibuot sáhttá dagahit issoras váikkuhusaid sámi servodahkii. Negatiiva váikkuhusat ja čuozahusat elektrifiseremis bohtet leat nu stuorrát sámi álbmogii ahte dát lea juoga maid Sámediggi oaivvilda luvvet konsultašuvdnageatnegasvuođa.

– Elektrifiseren boahtá dagahit stuora elfápmodárbbu mii eaktuda elfápmolinnjáid huksema, ja dát fas dagaha ahte šaddá preassa vel stuorát elfápmohuksemii guovllus, nu go bieggafápmui, mii ges dagaha ahte sámi guovllut unnot. Lea čielggas ahte doaibma boahtá buktit váikkuhusčuozahusaid ja ahte áššit fertejit geahčaduvvot oktilaččat. Danne leat mii gáibidan konsultašuvnnaid, dadjá Jåma.

Sámediggeráđđi ja stáhtačálli soabaiga ahte Oljo- ja energiijadepartemeanta sádde čálalaš árvvoštallama das oaivvilda go OED ahte elektrifiserenmearrádus geatnegahttá konsultašuvnnaid Sámedikkiin. Soai soabaiga maid viidáset gulahallat servodatovddideami ja elfápmodárbbu birra sámi guovlluin.