Nu go sámediggeráđđi lea álggahanjulggaštusastis, Mánočalbmi, evttohan, de áigot dál ásahit fágalávdegotti mii galgá revideret Sámedikki válgaortnega. Lea 20 jagi áigi go maŋemus ollislaččat geahčaduvvui Sámedikki válgaortnet. Dát guorahallan mielddisbuvttii earret eará ahte Sámediggi rievddai 13 válgabiires 7 válgabiirii.
Sametingspresident Silje Karine Muotka
Arvu/Sametinget
– 20 jagi addá buori vuođu árvvoštallat, ja danne mii oaivvildat ahte dál lea buorre áigi ollislaččat geahčadit. Mis lea mihttu ahte Sámediggi galgá leat sámi servodaga ovddasteaddji orgána, ja mii bivdit fágalávdegotti geahčadit lea go dárbu rievdadit válgaortnega olahan dihte dán mihttomeari, dadjá sámediggepresideanta Silje Karine Muotka (NSR).
Sámediggeráđđi lea čađahan máŋga čoahkkima joavkojođiheddjiiguin sihke posišuvnna ja opposišuvnna bealis vai sáhttá oažžut vuođu sihke mandáhta ja lávdegotti čoahkádusa ektui.
– Dát lea leamaš dehálaš sihkkarastit viiddis doarjaga lávdegotti bargui. Rievdadusat válgaortnegis gáibidit ollu doarjaga ja ovttamielalašvuođa, go dat leat demokratiija vuođđonjuolggadusat, dadjá Muotka.
Čuovvovaš olbmot evttohuvvojit lávdegoddái:
- Lávdegoddejođiheaddji: Postdoavttir Ragnhild Elisabeth Nilsson, Bergena universitehta
- Dutkanprofessor Mikkel Berg-Nordlie, Oslo Meteropolitan University
- Várrerektor Jonas Stein, Norgga arktalaš universitehta
- Jurista Line Aimee Kalak, Sámi allaskuvla
- Seniorráđđeaddi Lars Magne Andreassen, Árran julevsáme guovdásj
– Mii evttohit hui čeahpes fágaolbmuid geain lea viiddis gelbbolašvuohta sámi demokratiija birra. Ovttas leat sii hui heivvolaččat árvvoštallat dálá válgaortnega sihke evttohuvvon mandáhta vuođul ja min buohkaid beroštumi vuođul das ahte mis galgá leat buorre ovddastuslaš vuogádat, loahpaha sámediggepresideanta Muotka.
Evttohuvvo ahte lávdegoddi oažžu bargun buktit iežas raportta maŋimustá borgemánu 1. beaivvi 2027, dainna ulbmiliin ahte vejolaš rievdadusat sámelágas galget leat sajis ovdal 2029 válgga.
Áššeovddidusa ja mandáhta- ja čoahkádusevttohusaid sáhttá lohkat ollislaččat dás:
Ášši 011/26 - Fagutvalg for revisjon av Sametingets valgordning (ášši ii leat vel sámegillii jorgaluvvon)
Ášši meannuduvvo Sámedikki bajásšaddan-, fuolahus- ja oahppolávdegottis 9. vahkus ja Sámedikki dievasčoahkkimis duorastaga njukčamánu 12. beaivvi.