Loahpalaš iskkusbohtosat maid Veterinearainstituhtta lei váldán ledje negatiivat, ja Biebmobearráigeahčču duššindahká várohusa ahte bohccos Byrkijes lea CWD-dávda. Veterinearainstituhta álgoiskosat indikerejedje njoammuma. Čađahuvvojit máŋga dakkár iskosa, ja álgoiskosiid vuođul šattai vuorjašupmi mii dál lea čájehuvvon ahte ii leat vuođđu dasa.

– Lea dehálaš ahte dása leat buorit vuogádagat, ja lea maid dehálaš ahte čielggaduvvui čuođi proseantta sihkkarit ahte ii lean CWD-dávda. Lean ilus ja giitevaš dán dihte, dadjá Muotka.

Sámediggepresideanta deattuha ahte lea oadjebas vuogádat iskamiidda ja dát dahká ahte mis leat buorre obbalaš geahčestat.  

– Bohccobiergu lea dat dearvvašlaččamus biergu maid sáhtát borrat. Danne lea oadjebas ja buorre válljet borrat bohccobierggu.

Jearahallama addá sámediggepresideanta Silje Karine Muotka (NSR), +47 984 87 576, silje.karine.muotka@samediggi.no