Maja Kristine Jåma Sámediggi

– Sámediggi lea dorjon ollu buriid doaibmabijuid ja prošeavttaid ja mii leat hui duhtavaččat juolludemiiguin mat leat dahkkojuvvon. Mii illudit go ollugat besset vásihit girjáivuođa sámi dáidda- ja kulturovdanbuktimis, dadjá sámediggeráđđi Maja Kristine Jåma (NSR).

Ortnegiidda Kulturdoaibmabijut ja Luohti ja sámi musihkka leat boahtán ollu ohcamušat 2024:s ja lea dagahan ahte bušeahtta dáidda doarjjaortnegiidda dál lea geavahuvvon. Jagi 2024 bušeahtas lea várrejuvvon 3,806 miljovnna ruvnno kulturdoaimmaide, ja 2,5 miljovnna ruvnno luohtái ja sámi musihkkii.

– Boađus dás lea ahte mii fertet giddet dáid doarjjaortnegiid gaskaboddosaččat. Mii doaivut ahte mii sáhttit sirdit ruđaid ovdal čakčamánu loahpa, ja dalle fertet mii árvvoštallat sáhttit go rahpat eanet ohcamušaide, dadjá Jåma.

Dađi bahábut mearkkaša dát ahte dat ohcamušat mat leat juo boahtán ovdal geasi ja geasi mielde ožžot guhkit meannudanáiggi go dan mii lei meroštallojuvvon.