Mikkel Eskil Mikkelsen Vaino Rensberg, Sámediggi

Disdaga geassemánu 25. ja gaskavahku 26. beaivvi čoahkkanit 130 nuora Giellabiellje-konferánsii Stormen girjerádjosis Bådåddjos. Fáddán leat sámegielat, speallan ja teknologiija, ja sámegielaid boahtteáigi.

Giellabiellje 2024 fállá máŋggabealat prográmma logaldallamiiguin, bargobájiiguin ja kultuvrralaš doaluiguin. Oasseváldit ságastallet minoritehtagielaid hástalusaid ja vejolašvuođaid birra. Konferánssas deattuhuvvo erenoamážit teknologiija rolla álgoálbmotgielaid seailluheamis ja ealáskahttimis.

Konferánssas galget nuorat maiddái ráhkadit resolušuvnna mii geigejuvvo Sámediggái ja Gielda- ja guovlodepartementii. 

Sámediggeráđđi Mikkel Eskil Mikkelsen lea dat sámediggeráđis geas lea ovddasvástádus sámegielain. Mikkelsen oassálastá konferánsii ja son illuda guldalit nuoraid miehtá Sámi.

– Teknologiija jođánis ovdáneapmi ja goanstajierpmi ovdáneapmi dahket ahte sámegiella duođas čuovvu servodaga ovdáneami, dadjá Mikkelsen.

Giellabiellje lágidit Gielda- ja guovlodepartemeanta ja Sámediggi, lagas ovttasbargguin sámi nuoraidorganisašuvnnain Noereh ja Sámedikki nuoraidlávdegottiin (SáNUL).

Dá leat moadde váldočuoggá prográmmas:

• Gaming sámegillii: Sáhttitgo mii gamet eanet sámegillii? Lea go álki ráhkadit sámegiel spealuid?  Mii čohkket gameriid ja spealloovddideddjiid ságastallat sámi gamema birra. Ságastallamis leaba earret eará Lemet Máhtte Eira Sara, gii lea jorgalan Minecraft davvisámegillii, ja Casper Bolle, gii dál bargá Eydigard-spealuin. Doppe leat maiddái bargobájit main nuorat besset oahppat programmerema birra ja mot programmere spealuid sámegillii.
• Crashkursa sámegielain: Nuorat besset somás vugiiguin oahppat sámegielaid. Besset ovdamearkka dihte oahppat julevsámegiel ”slang”, ávkkálaš sániid davvisámegillii ja Hævvi galgá doallat seksuálaoahpahusa lullisámegillii. Lea maid vejolaš oahppat nuortalašgiela ja bihtánsámegiela, mat goappašagat leat áitojuvvon gielat.
• Paneladigaštallan Isalill Kolpusiin: Manne eat duostta sámástit jus ii leat áibbas buorre sámegiella? Mii digaštallat mii min hehtte sámástit ja Isalill Kolpus hástala Saara Hermansson, DJ Ailo, Aili Teigmo ja earáid oassálastit ságastallamii.
• Márkomeannu unna festiválaš ja ođđa ofelaččaid almmuheapmi: Yungmiqu, DJ Ailo ja Astrid Tuorda ja Saara Hermansson guoimmuhit musihkain. Ođđa ofelaččat almmuhuvvojit. Ovdal leat juohke jagi leamaš njeallje ofelačča, boahtte skuvlajagi leat guhtta ođđa nuora geat galget mátkkoštit Norggas oahpahan dihte sámi kultuvrra ohppiide.

Geahča olles prográmma