Giellaáittardeaddji ja giellaguovddážat ja váibmogiella bušeahttaevttohusas

Giellaáittardeaddji ja giellaguovddážat ja váibmogiella bušeahttaevttohusas

Sámegielaid oainnusmahttin lea deaŧalaš áŋgiruššansuorgi Sámediggeráđi bušeahttaevttohusas 2021. Fokus sámegielaide lokte daid ja boktá áŋgiruššama Sámis. Bušeahttaevttohus galgá meannuduvvot Sámedikki dievasčoahkkimis juovlamánus.

Sámi giellalávdegoddi ovddidii 2016:s čielggadusa NAČ 2016: 18 – Váibmogiella, ja Sámedikki dievasčoahkkin mearridii juovlamánus 2018 ollislaš strategiija sámegielaid várás, Gïelelutnjeme - Giellalåpptim - Giellalokten – Språkløftet. Sámediggeráđđi lea 2021 bušeahttaevttohusastis válljen áŋgiruššat doaibmabijuiguin mat leat čadnojuvvon dása ollu servodatsurggiin.

– Giela oainnusmahttin lea gullevašvuođa, leahkima ja dohkkeheami symbola. Danne áigu sámediggeráđđi áŋgiruššat dán jagi bušeahtas doaibmabijuiguin mat galget dán váikkuhit, ja mii joatkit áŋgiruššama Váibmogielain ja giellaloktemiin, dadjá sámediggeráđđi Mikkel Eskil Mikkelsen (NSR).

Giellaguovddážat

Oktiibuot 16 sámi giellaguovddáža ožžot njuolggodoarjaga Sámedikkis. Jagi 2021 rájes ožžot maiddái guokte ođđa giellaguovddáža fásta doarjaga Sámedikkis. Dát leaba Návuona giellaguovddáš Návuona suohkanis ja Sámi viessu Oslos.

– Sámi giellaguovddážiin lea giellafágalaš gelbbolašvuohta ja leat báikkálaš giellaguoddit. Guovddážat leat deaŧalaš ovttasbargoaktevrrat midjiide barggus sámegielaid loktemiin ja oainnusmahttimiin, muitala Mikkelsen. Dasa lassin leat mii nannen buot giellaguovddážiid nu ahte dat sáhttet váikkuhit 2021 Giellavahku čađaheami, leat bidjan 800 000 ruvnno dasa, dadjá Mikkelsen.

Sámi giellaguovddážiidda Gielearenie, Gïelem nastedh ja Aajege addojuvvo lassin okta ovtta jagi lasáhus 150 000 ruvnno guhtiige sámi báikenamaid čohkken- ja duođaštanbargui máttasámi guovllus.

Sámi giellaáittardeaddji

Sámediggeráđđi lea maiddái várren 650 000 ruvnno NAČ 2016: 18 – Váibmogiella čuovvuleapmái,  čuovvulit čielggadusa doaibmabijuid ja láhkabarggu.

– Midjiide lea deaŧalaš váiddavuoigatvuohta, sámelága giellanjuolggadusaid bearráigeahččan ja sámi giellaáittardeaddji ásaheapmi, dadjá sámediggeráđđi Mikkelsen, ja mii oaidnit ahte lea dárbu čielggadit dáid doaibmabijuid ekonomalaš ja hálddahuslaš váikkuhusaid. Danne leat mii várren ruđaid dáid čielggademiid dahkamii, dadjá Mikkelsen loahpas.

Sámedikki 2021 bušeahtta - sámediggerádi mearrádusárvalus (PDF, 2 MB)

Gažaldagaide vástida dahje addá jearahallama sámediggeráđđi Mikkel Eskil Mikkelsen (NSR)
+47 917 42 161 mikkel.eskil.mikkelsen@samediggi.no.