Sámediggi doallá oktii jagis giellaguovddášdeaivvadeami buot sámi giellaguovddážiidda. Dál leat 18 giellaguovddáža mat ožžot njuolggodoarjaga Sámedikkis, ja guokte giellaguovddáža ožžot golmma jahkásaš ásahandoarjaga. Jus doibmet bures ásahanáigodagas sáhttet oažžut bistevaš ruhtadeami Sámedikkis.

Mikkel Eskil Mikkelsen Sámediggi

Dán jagi deaivvadeapmi čađahuvvo Plaassjas, ja lea ovttasbargu Sámedikki ja Aajege saemien gïele- jïh maahtoejarnge, Plaassja giellaguovddáža gaskka.

Giellaguovddášdeaivvademiid mihttu lea fágalaččat nannet giellaguovddážiid, lonohallat jurdagiid, vásáhusaid ja juogadit gelbbolašvuođa.

Sámi allaskuvlla sámi sosiolingvistihkka professor Annika Pasanen logaldallama fáddán lea movt sáhttá oahpahit ja ovdánahttit sámegiela sihke mánáide, nuoraide ja rávesolbmuide.

– Giellaguovddážiid váldobargu lea lasihit sámegielaid geavaheami, ja mun doaivvun ahte dát logaldallan šaddá hui ávkkálaš sidjiide, lohká Mikkelsen.

Sámediggi ruhtada giellagurssaid lassin maid giellaarenaid čađaheami. Deaivvadeami nuppi beaivvi galget golbma giellaguovddáža muitalit movt sii barget giellaarenaiguin. Giellaarenat leat deaivvadanbáikkit gos oasseváldit geavahit sámegiela, ja fáttat sáhttet leat árbevirolaš máhttu, stoahkan ja duddjon.

Dáid ovdanbuktimiid maŋŋil leat joavkobarggut main giellaguovddážat juogadit dieđuid iežaset giellaarenaid birra, ja ovttas hutket ođđa giellaarenaid ja mot daid galggašii čađahit.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no