Guovttegielalašvuođadoarjja addojuvvo sámegiela hálddašanguovllu gielddaide ja fylkkagielddaide ja galgá váikkuhit dasa ahte ássiid gielalaš vuoigatvuođat gozihuvvojit almmolašvuođa deaivvadeamis. Doarjja galgá gokčat gielddaid ja fylkkagielddaid bargguid mat leat geatnegahtton sámelága vuođul ja giellaovddidandoaibmabijuide mat eai leat geatnegahtton lága vuođul.
Maren Benedicte Nystad Storslett
Árvu/Sametinget
– Dát doarjja lea deaŧalaš oassi gielddaid ja Sámedikki giellabarggus, daningo dat sihkkarastá ahte álbmot oažžu bálvalusaid sámegillii ja beassá geavahit sámegiela go sis lea oktavuohta almmolaš ásahusaiguin, dadjá sámediggeráđđi geas lea ovddasvástádus gielas, Maren Benedicte Nystad Storslett (NSR).
Stuorradiggi dohkkehii sámelága rievdadusaid ođđajagemánu 1. beaivvi 2024 rájes. Sámelága giellanjuolggadusaid rievdadusaid geažil lea dárbu heivehit guovttegielatvuođadoarjagiid doarjjaortnega sámegiela hálddašanguovllu gielddaide ja fylkkagielddaide.
Okta váldoulbmil lea ahte doarjjaortnet galgá veahkehit gielddaid deavdit iežaset geatnegasvuođaid sámelága giellanjuolggadusaid ektui. Sámelága rievdadusaid mielde sirrejuvvojit gielddat golmma jovkui; giellaovddidangielddat, giellaealáskahttingielddat ja giellamovttiidahttingielddat. Juohke kategoriijai gustojit sierra njuolggadusat ja doarjjaortnet ferte dávistit daid iešguđetge gieldakategoriijaid geatnegasvuođaide.
– Ođđa doarjjaortnet galgá addit buriid rámmaeavttuid, leat buorebut heivejuvvon ja addit ovdánanvejolašvuođaid ođđa gieldakategoriijaid vuođul. Doarjjaortnet galgá maiddái addit gielddaide vejolašvuođa dustet sámi servodaga gelbbolašvuođadárbbuid. Seammás ii oktage gielda galgga oažžut unnit guovttegielatvuođadoarjaga, dadjá Nystad Storslett.
Gulaskuddan lea rabas buohkaide, ja Sámediggi ávžžuha erenoamážit gielddaid, fylkkagielddaid ja eará aktevrraid main lea ovddasvástádus dahje beroštupmi sámi giellahálddašeamis searvat.
Gulaskuddan čađahuvvo digitálalaččat. Lea vejolaš searvat gulaskuddamii Sámedikki neahttasiidduin: Gulaskuddan - Láhkaásahus guovttegielatvuođadoarjaga birra sámegielaid hálddašanguovllu gielddaide ja fylkkagielddaide
Gulaskuddanáigemearri lea cuoŋománu 18. beaivvi 2025.