Evttohusaid ulbmil lea nannet oahpahusa lohkamis, čállimis ja rehkenastimis, seammás go ráhkadit eanet saji stoahkamii, fysalaš aktivitehtii, sosiála oahppamii ja ohppiid dovdduid ovdáneapmái.

Manne lea gulaskuddan dehálaš sámi oahpahussii?

Árvalusain sáhttá leat mearkkašupmi dasa movt sámi giella, kultuvra ja árbevirolaš máhttu vuhtiiváldo vuosttaš skuvlajagiin. Sámediggi háliida danne oažžut árvalusaid sámi oahpaheddjiin, váhnemiin ja ohppiin, skuvlaeaiggádiin, váhnemiin, fágabirrasiin ja eará berošteddjiin. Mii háliidit erenoamážit cealkámušaid dasa ahte sáhttet go evttohusat dagahit eanet ollislaš ja dávgasis oahpahusa mii lea heivehuvvon sámi ohppiid gillii, kultuvrii ja oahppanárbevieruide ja báikkálaš dilálašvuođaide.

Dát guoská gulaskuddamii

Gulaskuddan fátmmasta golbma váldosuorggi:

• Oahppoplánaid organiseren: Árvvoštallojuvvo galgágo oahpahus organiserejuvvot viidát fágasurggiide go dálá fágavuođđuduvvon struktuvrii, vai ovttaskas fágaid ja fágasurggiid ovttastahttin. Mihttomearrin lea ráhkadit eambbo ollislaš ja ahkeheivehuvvon skuvlaálgima
• Oahppoplána mihttomearit: Árvvoštallojuvvo galget go oahppoplánas leat mihttomearit mat addet dorjot álgooahpahusa ja oahpaheddjiid pedagogalaš barggu. Mihttomearrin lea oainnusin dahkat dehálaš beliid oahppamis ja ovdáneamis mat eai heive dábálaš gealbomihttomeriide.
• Fága- ja diibmojuohku: Árvvoštallojuvvo galgágo 1. ja 2. ceahkkái bidjat unnimus diibmologu, ja berrejit go leat čielgaset gáibádusat dasa man ollu áiggi galgá bidjat iešguđet osiide oahpahusas.

Evttohusaid duogáš lea earret eará vuorjašupmi heajos bohtosiid geažil lohkamis ja rehkenastimis vuođđoskuvllas ja hástalusat mat gusket motivašuvdnii, loaktimii ja fátmmasteapmái. Dutkamušat čájehit maid ahte stoahkan ja fysalaš aktivitehta sáhttet doarjut sihke oahppama ja sosiála ovdáneami.

Gulaskuddan guoská sihke LK20 ja LK20 Sámi (LK20S), muhto ii fátmmas astoáiggeprográmma (SFO). Vejolaš rievdadusat galget plána mielde gustogoahtit skuvlajagi 2028-2029 rájes

Gažaldagat reflekšuvdnii

Sámi perspektiivvas lea deaŧalaš ahte sáddejuvvojit cealkámušat dáid birra:

• Livččii go organiseren viidát fágasurggiide álkidahttán integrerema sámegiela, kultuvrra, árbevirolaš máhtu ja báikkálaš vásáhusaid oahpahussii?
• Livčče go dákkár organiseren sáhttán ovttastahttit sámi máhttotradišuvnna mielde, gos oahppan sáhttá dáhpáhuvvat praktihkalaš doaimmaid bokte?
• Váikkuhago stuorát deaddu stoahkamii, guorahallamii ja fysalaš lihkadeapmái dasa ahte skuvlaálgin šaddá eanet relevánta ja mearkkašahtti sámi ohppiide?
• Sáhttet go evttohusat addit buoret sirdašuvvama mánáidgárddi ja skuvlla gaskii ohppiide geat bohtet sámegielat mánáidgárddiin?
• Sáhttá go lasihuvvon fleksibilitehta álkidahttit oahpahusa heivehit báikkálaš sámegiela, kultuvrra ja árbevirolaš oktavuođaide?
• Jus dárogiella ja sámegiella ain galget organiserejuvvot sierra fágan, oažžu go dalle sámegiella dásseárvosaš saji oahpahusas? 
• Váikkuhit go evttohusat dasa ahte sámi lohkan- ja čállinoahpahusa nannejuvvo?
• Jus oahppoplánaide ráhkaduvvojit ođđa mihttomearit, mo dat sáhttet vuhtiiváldit identitehtaovdáneami, giellageavaheami, gullevašvuođa, oktavuođaid ja kulturipmárdusa?
• Movt sáhttet vejolaš rievdadeamit fága- ja diibmojuohkimis váikkuhit vejolašvuođaide addit buori fálaldaga sámegielas ja sámi fágain?

Sádde cealkámušaid

Gulaskuddan lea rabas buohkaide. Sámediggi ávžžuha sámi oahpaheddjiid, skuvlajođiheddjiid, skuvlaeaiggádiid, váhnemiid, organisašuvnnaid ja eará berošteddjiid sáddet gulaskuddancealkagiid.

Gulaskuddanáigemearri: Skábmamánu 16. b. 2026

Loga eanet gulaskuddama birra Oahpahusdirektoráhta neahttabáikkis ja buvtte iežat cealkámušaid