Runar Myrnes Balto Árvu/Sámediggi

Gulahallančoahkkimat Duohtavuođa- ja soabadankommišuvnna raportta birra 

— Sámediggeráđđi lea ávžžuhan ásahusaid ja servviid láhčit buori gulahallama Duohtavuođa- ja soabadankommišuvnna raportta birra. Lea leamaš vejolaš ohcat doarjaga lágidemiide main raporta lea fáddán. Mii leat dál juolludan doarjaga máŋga diekkár gulahallančoahkkimiidda, ja doaivut ahte dát čoahkkimat sáhttet midjiide čujuhit maid mii berret vuoruhit dan stuorra divodan- ja soabadanbarggus mii lea min ovddabealde, dadjá sámediggeráđđi Runar Myrnes Balto (NSR).

Mjøsan Dajve Saemien Sibrie lea ožžon 10 000 ruvnnu gulahallančoahkkimii Duohtavuođa- ja soabadankommišuvnna raportta birra, ja Astavuona Samiduodji lea ožžon 15 000 ruvnnu dakkár čoahkkimii. Vuođđudussii Nasjonal Vill-laks senterii lea juolluduvvon 40 000 ruvdno čoahkkimii Duohtavuođa- ja soabadankommišuvnna raportta birra, kapihttaliin 21 ja 22, mii lea mearrasámi guolásteami ja luossabivddu birra Deanučázádagas. Doarjagat leat addojuvvon doarjjaortnegis Kulturdoaimmat deaivvadanbáikkiid várás gos digaštallet Duohtavuođa- ja soabahankommišuvnna raportta sisdoalu.

Duoddara Ráfe lea ožžon 17 000 ru doarjjaortnegis Ásahusovddideapmi ásahit deaivvadansaji bihtánsámi guvlui mas digaštallet Duohtavuođa- ja soabadankommišuvnna raportta sisdoalu.

Doarjja musihkkabuktosiidda ja konsearttaide 

Komponista Jakop Filip Janssønn Hauan lea ožžon 100 000 ruvnno musihkkabuktosa Juovssaheaddji/The Repatriator/Tilbakeføreren lágideapmái. Dát musihkkabuvtta lea sámi vuoiŋŋalašvuođa ja eanavuoigatvuođaid birra. Buktosa vuolggasadji lea justisaprotokolla mii lea dáiddalaš vuođđun aiddo čállojuvvon lyrihkkii, luohtái ja musihkkii. Álgočájálmas lea guovvamánu 7. beaivvi 2024 Bådåddjo 2024 sámi rahpamis. 

Lea maid juolluduvvon doarjja guovtti konsertii. Mjøsan Dajve Saemien Sibrie lea ožžon 20 000 ruvnno lágidit sámi nuoraideahkeda Lillehammeris Lávre artisttain, ja Davvi Division Guovdageainnus lea ožžon 75 000 ruvnno lágidit Lounge Sápmi juovlakonseartta.

– Addit artisttaide ja musihkkáriidda vejolašvuođa bovdet gehččiid konsearttaide lea deaŧálaš, ležžet dal stuora dahje smávva arenain. Bådåddjo 2024 lea ožžon stáhtusa Eurohpalaš kulturoaivegávpogin 2024, ja lunddolaš lea ahte sámevuohta galgá oidnot doppe. Seammás lea deaŧalaš ahte maiddái smávit lágideamit nu go nuoraidkonsearta Lillehammeris ja juovlakonsearta Guovdageainnus ožžot ruđalaš doarjaga, dadjá sámediggeráđđi Myrnes Balto. 
Buot dát doarjagat leat juolluduvvon doarjjaortnega Doarjja kulturdoaimmaide bokte.

Juoigan johkafatnasis

DAT OS:ii lea juolluduvvon 95 000 ruvnnu prošektii Luođik - luohtejietnaduodji mas Jalvvi Niillas - Niillas Holmberg lea mielde. Jalvvi Niillas juoigá iežas máttuid ja sogalaččaid, ja son juoigá johkafatnasis. Dán skearrus ii leat musihkka, gullojit dušše johkafatnasa iešguđetlágan lihkastagaid jienat.

– Dát lea gelddolaš ja ođđa lágan skearru, go jietnabáddi lea dahkkon johkafatnasis. Ohcamis čállá ohcci ahte ulbmil almmuhemiin lea addit guldaleaddjái fámolaš dovddu ja ánssášuvvon bottu. Ja dat soaitá leat juoga maid ollugat dárbbašit hohppos árgabeaivvis, loahpaha sámediggeráđđi Runar Myrnes Balto (NSR).

Doarjja lea juolluduvvon doarjjaortnegis Luohti ja sámi musihkka.