Sámediggi lea juolludan 500 000 ruvnno doarjjan Ovddos AS:a áŋgiruššamii Nannet, man ulbmilin lea hukset boazodoallofágalaš gelbbolašvuođaguovddáža Guovdageidnui.

Dát áŋgiruššan lea álggahuvvon dan geažil go Guovdageaidnu lea nuppástuhttinproseassas, ja háliidit boazodoalu maid fátmmastit ovdánahttinbargui.

Berit Marie P.E. Eira Árvu/Sametinget

Seammás lea Ovddos AS’a mihttu ahte dát galgá šaddat gelbbolašvuođaguovddážin  boazodollui miehtá riikka. Doarjjaruđat váldojuvvojit Sámedikki boazodoalu doarjjaortnegis.

Doarjja lea juolluduvvon Sámedikki Vuođđoealáhusat – boazodoallu doarjjaortnegis.

– Dán áŋgiruššamii mis lea buorre jáhkku. Boazodoallofága gelbbolašvuođaguovddáš mii lea vuođđuduvvon boazodoalu sávaldagaide ja dárbbuide, jáhkkit mii sáhttá leat dehálaš boazodollui boahtteáiggis, dadjá sámediggeráđđi Berit Marie Eira (JSL).

Sámediggi lea maid juolludan 250 000 ruvnno doarjjan Sápmi Business Arena lágideapmái. Dát lágideapmi lágiduvvui Guovdageainnus vuosttaš geardde 2022 giđa ja dat lihkostuvai hui bures.

Silje Karine Muotka Árvu/Sametinget

Dál háliida Ovddos AS fas lágidit dan. Sámediggi oaivvilda ahte Sápmi Business Arena lea buorre prošeakta ja lea danne juolludan doarjaga regionálaovddidanprošeavttaid doarjjaortnegis.

– Sápmi Business Arena vuosttaš lágideapmi movttiidahtii sámi fitnodagaid ja fidnohutkiid, ja lea illudahtti beassat leat mielde váikkuheamen 2023 čavčča  lágideapmái. Konferánsa lea deaivvadanbáiki sámi ealáhusaktevrraide miehtá Sámi, ja mii jáhkkit ahte konferánsa váikkuha sihke ahtanuššama ja ovdáneami, dadjá sámediggepresideanta Silje Karine Muotka (NSR) loahpas.