Guovttis golmma politihkalaš ráđđeaddis leat sajis

Guovttis golmma politihkalaš ráđđeaddis leat sajis

Sámediggepresideanta Silje Karine Muotka (NSR) lea nammadan sámediggeráđđái guokte golmma politihkalaš ráđđeaddis. Eirik Larsen (NSR) ja John Mathis Utsi (JSL) leaba juo álgán virggiide, ja maŋemus ráđđeaddi Guovddášbellodaga bealis ii leat vel nammaduvvon.Sámediggepresideanta Silje Karine Muotka (NSR) ovttas politihkalaš ráđđeaddiiguin Eirik Larsen (NSR) ja John Mathis Utsi (JSL) Vaino Rensberg/Sámediggi   

Ovttasbargoguoimmit NSR, Johttisápmelaččaid listu ja Guovddášbellodat leat ovtta oaivilis nannet Sámedikki beaivválaš politihkalaš barggu.

– Mis leat stuora ambišuvnnat ja olu bargu vuordime. Áigodagas áigut lágidišgoahtit vihtta dievasčoahkkima jahkásaččat, mii mearkkaša ahte galgat buktit eambbo áššiid Sámedikki dievasčoahkkimii. Boazodoallolága lávdegoddi áigu buktit iežas rávvagiid. Mis leat máŋga stuora ja gáibideaddji láhkaproseassa jođus. Sámelága giellanjuolggadusat, ođđa minerálaláhka ja joatkit Sámevuoigatvuođalávdegotti 2 barggu lea oassi stuorebuš áššiin. Dasa lassin galgá Duohtavuođa- ja seanadankommišuvdna gárvet sin raportta. Buot áššit gáibidit politihkalaš doaibmanávccaid, lohká sámediggepresideanta Silje Karine Muotka (NSR).

– Goalmmát ja maŋemus ráđđeaddi ii leat vuos gearggus, muhto sáhtán almmostahttit ahte áiggun nammadit nissonolbmo politihkalaš ráđđeaddin, dadjá Muotka.  

Eirik Larsen joatká politihkalaš ráđđeaddin, dán vuoro Silje Karine Muotka sámediggeráđi ovddas. Dat mearkkaša ahte Eirik Larsen ohcá luvvejuvvot iežas doaimmas sámediggeáirrasin.

– Lean hui olus go lean nammaduvvon politihkalaš ráđđeaddin. Mis leat olu stuora áššit mat vurdet, ja mun illudan veahkehit sámediggepresideantta ja sámediggeráđi sihke stuorebuš ja unnit áššiin, dadjá Eirik Larsen (NSR).

Johttisápmelaččaid listtu John Mathis Utsi lea sámediggeráđi ođđa ráđđeaddi. Utsi lea boazodoalli ja lea kárášjohkalaš.

– Illudan dan miellagiddevaš ja dehálaš bargui mii vuordá. Boazoeaiggádin de lea dieđusge boazodoallu juoga mas beroštan ja mainna áŋgirušan, muhto beroštan hirbmosit sámi áššiin obbalaččat, nu go gielas, kultuvrras, luođis ja dálkkádagas, dadjá John Mathis Utsi (JSL).

Utsi lea Johttisápmelaččaid listtu vuosttaš várrelahttu Sámedikkis, ja ohcá luvvejuvvot iežas doaimmas várreáirrasin.

Gulahallanolbmot:

Sámediggepresideanta Silje Karine Muotka, tlf. 984 87 576
Politihkalaš ráđđeaddi Eirik Larsen, tlf. 970 80 217
Politihkalaš ráđđeaddi John Mathis Utsi, tlf. 951 75 908