— Sámediggeráđđi háliidat hábmet ollislaš sámi mediapolitihka. Dehálaš lea sihkkarastit dakkár máŋggabealat mediafálaldaga sámi álbmogii mii lea buorre vuođđun sámi servodatdigaštallamii, sámi sátnefriijavuhtii, ja addá vejolašvuođa sámiide searvat demokratiijii, dadjá ráđđelahttu Maja Kristine Jåma (NSR).

Mediat leat aviissat, rádio, TV ja maiddái eará medialávddit gos almmuhit ođđasiid, ja maiddái eahpeformála kanálat nu mo sosiála mediat.

Mii leat buohkat mediageavaheaddjit, ja dál háliidat gullat du oaiviliid čuovvovaš gažaldagain:

1. Mii lea du mielas sihke buorre ja unnán buorre sámi mediain (Omd. sáhtát čilget ahte gokčet go sámi mediat guovllu gos don orut ja mo mediat vuoruhit sámegielaid?)

2. Sámi geahčastagas dahje perspektiivvas, mo muitaluvvo dat mediain?

3. Leatgo dus jurdagat sámi mediaid birra ja mas mii Sámedikkis galggašeimmet leat fuolas go čállit mediadieđáhusa? Juogat áinnas jurdagiiddát dahje árvalusaid minguin!

Din vástádusaid meannudat mii anonymalaččat. Muhtin vástádusaid geavahat mediadieđáhusas, muhto eat almmut sin geat leat čállán dáid. Evttohusaid sáhtát sáddet samediggi@samediggi.no , ja mii bivdit din vástádusaid ja oaiviliid ođđajagimánu 5. beaivvi 2023.