Sámediggeráđđi ovddida čakčamánus ášši Sámedikki dievasčoahkkimii mas geahčadit geográfalaččat sámi servodaga fálaldagaid.

– Mii leat ráhkadan dilleraportta gos sámi servodagas gávdnojit ja gos eai gávdno fálaldagat. Dan maid mii oaidnit, mii ii hirpmástuhte, lea ahte leat guovllut gos dáruiduhttinpolitihkka lihkostuvai buoremusat, gos dál váilot olu fálaldagat, dadjá sámediggeráđđi Runar Myrnes Balto (NSR).

Duohtavuođa- ja soabahankommišuvdna duođaštii movt dáruiduhttinpolitihkka dagahii giella- ja kulturvahágiid. Sámedikki dievasčoahkkin gesii raportta ollislaš meannudeamis ovdan ahte lea dárbu ovddidit fálaldagaid báikkálaččat, oassin divodanbarggus maŋŋá dáruiduhttima. Ášši maid sámediggeráđđi dál ovddida meannudeapmái, lea boahtte lávki mii galgá konkretiseret dán.

– Mii háliidit ahte Sámediggi galgá bargat dan ala ahte ásahuvvojit fálaldagat eanet báikkiin, dakkár vuogi mielde mii lea vel eanet aktiivvalaš go ovdal. Dát lea ođđa bargovuohki go dat mii lea leamaš dábálaš, mas Sámediggi vuosttažettiin lea dorjon báikkálaš álgagiid. Dáruiduhttima vahágiid buorideapmái soaitá leat liige dárbu ásahusaide ja deaivvadansajiide doppe gos dáruiduhttin lei garraseamos, ovdamearkka dihtii mearrasámi guovlluin, dadjá sámediggeráđđi Myrnes Balto.

Sámediggeráđđi váldá iežas evttohusas ovdan ahte dan ferte dahkat lagaš ovttasbargguin báikegottiiguin, gielddaiguin ja fylkkaiguin. Danne áigot doallat álbmotčoahkkimiid ja ráhkadit sierra regionála plánaid juohke Sámedikki válgabiirii. Dát lea áddjás bargu, mii álggahuvvo giđđajahkebealis 2025 ja bistá boahttevaš jagiid.

Sámediggeáirasat galget meannudit ášši Sámedikki regiovnnalaš čuovvoleapmi Duohtavuođa- ja soabahankommišuvnna raporttas vahkus 39, dalle go Sámediggi deaivvada lávdegodde- ja dievasčoahkkimiidda Sámedikkis Kárášjogas.

Loga dievasčoahkkinášši: Regional oppfølging av Sannhets- og forsoningskommisjonens rapport  (PDF, 2 MB)