Lávdegotti lea Sámediggi ja Norgga Boazosámiid riikasearvi nammadan, ja čállojit historjágirjjiide vuosttaš sámi láhkalávdegoddin mii árvala rievdadusaid lágas mii regulere sápmelaččaid iežaset eallinlági ja ealáhusa. 
Silje Karine Muotka
Máret Inger A. Anti/Sametinget
– Boazodoalloláhkalávdegotti árvalus váikkuha ovttaskas boazodoallái, siiddaosiide, siiddaide, orohagaide, boazodolliid eiseváldeorgánaide ja muđuid servvodahkii. Ovdanbuktin lea áigeguovdil stuorra oassái servvodahkii, lohká sámediggepresideanta Silje Karine Muotka (NSR).
Gustovaš boazodoalloláhka lea jagis 2007 rájes, muhto lágas leat leamašan máŋga rievdadusa ovttaskasmearrádusaid ektui. Sámediggi ja NBR nammadii boazodoalloláhkalávdegotti geat galge árvvoštallat ollislaččat boazodoallolága ja dan vuođul árvalit rievdadusaid. Lei dárbu árvvoštallat lága ollislaččat, ovttas singuin geat dovdet boazodoalu, leš dal ieš boazodoalli dahje lea boazodoalu ja boazodoallorievtti fágačeahppi.
Boazodoalloláhkalávdegotti rievdaduvvon boazodoallolága árvalusat almmuhuvvojit Sámedikkis Kárášjogas vuossárgga 12.09 diibmu 11.00- 15.00. Dat maid čájehuvvo Sámedikki Web-tv bokte.
Seminára rahpá sámediggepresideanta Silje Karine Muotka. Álggahansártni doallaba maid Norgga Boazosámiid Riikasearvvi, jođiheaddji Inge Even Danielsen ja sámediggeráđi Hans Ole Eira. Boazodoalloláhkalávdegotti jođiheaddji Øyvind Ravna ovdanbuktá árvalusaid.
Media ja geahččit leat bures boahtin Sámediggái čuovvut láhkalávdegotti ovdánbuktima ja sáhttet jearrat gažaldagaid.
Seminára prográmma
11:00 – 11:10 Buohkat gávdnet sajiid
11:10 – 11:30 Sámediggepresideanta Silje Karine Muotka álggaha seminára ja giitá láhkalávdegotti
11:20 – 11.35 Norgga Boazosápmelaččaid Riikasearvvi (NBR) jođiheaddji Inge Even Danielsen: sátnevuorru ja dearvuođat Boazodoalloláhkalávdegoddái
11:35 – 11:50 Boddu
11:50 – 12:50 Boazodoalloláhkalávdegotti jođiheaddji Ravna ovdanbuktá láhkalávdigotti evttohusa
12:50 – 13:05 Boddu
13:05 – 13:50 Gažaldagat
13:50 – 14:10 Ráđđeláhttu Hans Ole Eira loahpaha seminára