Sámediggepresideanta Silje Karine Muotka ja sámediggeráđđi Runar Myrnes Balto, gean politihkalaš ovddasvástádussuorgi lea duohtavuohta ja soabadeapmi, leigga goappašagat Duohtavuođa- ja soabadankommišuvnna raportta almmolaš geigemis Stuoradikkis odne geassemánu 1. beaivvi.

– Mun háliidan giitit buohkaid sin geat leat leamaš duohtavuođavihtanin kommišuvdnii. Din jienaid ja muitalusaid haga eat livčče mii ožžon dán vejolašvuođa geahččalit čoavdit dán oktasaš ja bávččas historjjá. Dál mii fertet geavahit áiggi diktit duohtavuođavihtaniid ollu ja lossa muitalusaid vuodjut, dadjá sámediggepresideanta Silje Karine Muotka (NSR).

Sámediggepresideanta dadjá ahte sámi servodat ferte ráhkkanit dasa ahte dat sáhttá leat hui lossat oallugiidda sámi servodagas ja ahte servodat ferte lea gearggus dustet dan.

Masa 700 siidosaš raporta gieđahallá ollu iešguđet fáttáid nugo dearvvašvuođa- ja sosiálapolitihkalaš hástalusaid, giellamassima, oahpu ja oahpahusa, girkoeallima ja ealáhusaid nu mo guolásteapmi ja boazodoallu, namuhan dihtii muhtun fáttáid. Raporttas bohtet maiddái ovdan váidudeaddji doaibmabijut.

Sámediggeráđis leat vuordámušat dasa movt Norgga eiseválddit dál čuovvulit raportta, ja muittuha ahte searvadahttin lea dehálaš. Seammá dehálaš lea ahte Sámediggi nannejuvvo vai lea vejolaš čuovvulit raportta.

– Juohke álbmogis lea riekti gullot áššiin mat gusket váidudeaddji doaibmabijuide, ja ferte láhččojuvvot dilli iehčanas proseassaide Stuoradikki ja iešguđet álbmogiid gaskkas. Stuoradiggi ferte maiddái diehtit ahte sámi servodat vuordá Sámedikki, sámi álbmoga politihkalaš orgána, čuovvulit raportta. De ferte Sámediggái dahkat vejolažžan dustet dáid vuordámušaid, dadjá sámediggeráđđi Runar Myrnes Balto (NSR).

Kommišuvnna jođiheaddji Dagfinn Høybråten dajai otná geigejumis ahte dáruiduhttin ain dáhpáhuvvá.

– Min čielga oaivil lea ahte dáruiduhttin ferte bissehuvvot, loahpaha Myrnes Balto.

Sámedikki dievasčoahkkin meannuda raporta juovlamánu dievasčoahkkimis.

Loga olles raportta Stuoradikki neahttasiiddus