Sámediggeráđđi Mikkel Eskil Mikkelsen bođii Girkonjárgii dainna deaŧalaš ođđasiin ahte nuortalaččat ožžot sierra saji Sámedikki 2025 bušeahtas. Sámediggeráđđi árvala nuortalaš organisašuvnnaid nannema váste juolludit 400.000 ruvnno Norrõs skoltesamene searvái.

– Mii dárbbašit nana nuortalaš organisašuvnnaid, ja danne sámediggeráđđi lea árvalan juolludit 400.000 ruvnno Norrõsii jahkái 2025, dadjá duhtavaš Mikkelsen.

Sámediggeráđđi Mikkel Eskil Mikkelsen lea čoahkkimis Mátta-Várjjaga gielddain ovttasbargošiehtadusa birra duorastaga golggotmánu 24. beaivvi diibmu 14:00–15:30, Girkonjárgga ráđđeviesus.

Dan olis go Mikkelsen lea fitname Girkonjárggas, searvá son álbmotčoahkkimii duorastateahkeda. Čoahkkimis ovdanbuktá movt Sámediggi vuoruha Nuorta-Finnmárkku bušeahtas, ja mihttomearri lea ásahit giellaguovddáža gildii.

Sámediggi lea máŋga jagi vuoruhan nuortalaš giela ja kultuvrra. Mikkelsen čujuha máŋgga bušeahttamearrádussii mat dán áigodaga leat mearriduvvon: 

• Jagis 2024 oaččui Äʹvv nuortalaš musea vel liige miljovnna iežaset giella- ja kulturbarggu nannemii
• Stipeandaortnegat leat dál maiddái nuortalašgiela oahpuid váste
• Sää'msijdd/Skoltebyen divodeapmi ja gaskkusteapmi
• Ruhta nuortalaš kulturjahkái 2026
• Veahkehan Anára gieldda ja Mátta-Várjjaga gieldda Interreg-prošeavtta olis

– Sámedikkis lea mihttomearri revitaliseret nuortalaš giela ja kultuvrra ja dan mii čuovvolit iežamet bušeahttaárvalusain. Guovddáš oassi das lea nannet nuortalaš birrasiid ja ásahusaid kapasitehta, dadjá Mikkelsen.