Loga Sámelága kap. 4

Loga ođđasa BIrasdirektoráhta neahttabáikkis: Åpner 16 stengte lakseelver – strammer inn i Varanger

Mearraluossabivdu gáržžiduvvo njealji beaivvis guovtti beaivái dan guovtti vahkus mii lea báhcán dán jagi áigodagas, Stuorravuonas/Karlebotn, Njávdánvuonas/Kjøfjord, Báhčaveaivuonas/Bøkfjord ja Ruovdevuonas/Jarfjord. Dain jogain mat golget Várjjatvuona guvlui oktan oalgejogain loahpahuvvo luossabivdu guokte vahku ovdal go dan mii ovdalaččas lea mearriduvvon. Dat mearkkaša ahte luossabivdu giddejuvvo borgemánu 17. beaivvi Stuorrajogas/Komagelva, Gállojogas/Skallelva, Ánnejogas/Vestre Jakobselv ja Suovvejogas/Bergebyelva, ja borgemánu 1. beaivvi Storelvas, Uvdus/Munkelva, Fállejogas/Haukelva, Guolleveajis/Braselva, Važžejogas/Sandneselva, Veadjejogas/Klokkerelva ja Nyelvas.

– Mu mielas lea moaitinveara go Birasdirektoráhta ii leat konsulteren guoskevaš sámi vuoigatvuođaoamasteddjiiguin. Bivdu, Mátta-Várjjaga Mearraluossabivdosearvi, Finnmárkku Mearraluossabivdosearvi, Njávdánjoga Guolástansearvi ja Norrõs Nuortalaččat gullet daidda geat livčče galgan konsulterejuvvot, lohká sámediggepresideanta Silje Karine Muotka. Son deattuha ahte dát ii dárbbaš leat ollislaš listu, go buot sámi joavkkut maidda ášši guoská sáhttet gáibidit konsultašuvnna, iige leat gáibádus ahte lea sierra organisašuvdnanummar.

Sámediggi oaivvilda ahte ii leat doarvái geavahit 2014 prosedyraid danne go Konsultašuvdnaláhka lea boahtán fápmui dan rájes (2021).

– Konsultašuvdnaláhka ásahuvvui juste dan dihte ahte sihkkarastit buriid proseassaid ja ahte lea legitimitehta báikkálaččat. Dan ferte maid Birasdirektoráhta váldit vuhtii, dadjá sámediggepresideanta. Son oaivvilda ahte luossabivdu mearas ja jogain lea deaŧalaš sámi ávkkástallan ja ealáhus kulturguoddi.