– Ii dohkálaš vuorddihit vihtta jagi boazomearkka áššemeannudemiinSámedikki presideanta Silje Karine Muotka moaitá garrasit go Stáhtahálddašeaddji viđa jagis ii leat azihan meannudit boazomearkaohcamušaid.– Dat lea áibbas dohkketmeahttun, ja mun ipmirdan ahte dát čuohcá garrasit olbmuide geat vurdet mearkadohkkeheami. NRK Sápmi lea muitalan Nina Karita Eira birra, gii ozai boazomearkka iežas bárdnái 2019:s ja vihtta jagi maŋŋel ii leat vel ožžon mearkka, ja Elle Márjá Eira birra, gii ozai ges mearkka iežas bárdnái 2021:s, muhto ii leat ožžon mearkaohcamuša meannuduvvot. Romssa ja Finnmárkku Stáhtahálddašeaddji bealis muitalit ges ahte sis leat sullii 280 mearkaohcamuša mat eai leat gieđahallojuvvon, dan dihte go leat vuoruhan eará áššiid mearkaohcamušaid ovdalii.Loga eanet ášši birra NRK Sámi neahttabáikkis– Imaštalan sakka movt stáhta sáhttá ná hálddahuslága ektui olgguštit boazodoalu ja goazahit boazodolliid ja boazoealáhusa ovdáneami, dadjá Muotka, gii áigu čuovvolit ášši.– Áiggun gáibidit čoahkkima Stáhtahálddašeddjiin, ja maiddai guovddáš eiseválddiiguin geat galget gozihit hálddahuslága čuovvuma, loahpaha Muotka. Almmuhuvvon 14.08.2024 08.08 Maŋemusat rievdaduvvon 14.08.2024 08.08