– Ii leat sadji hukset bieggafámu boazodoalloorohagaide

– Ii leat sadji hukset bieggafámu boazodoalloorohagaide

Sámediggeráđđi ii doarjjo eanet bieggaindustriijahuksemiid boazodoalloorohagaide.  
– Bieggafápmohuksen fárrolaga eará infrastrukturhuksemiin ja maiddái stáhta boraspirepolitihkka, leat stuorra noađđin guoskevaš boazodollui, oaivvilda sámediggeráđđi Silje Karine Muotka (NSR).

Sámedikki dievasčoahkkin áigu boahtte vahkus meannudit ášši Sámedikki oainnu birra bieggaindustriijai nannámis. Čalmmustuvvon lea stuorradiggedieđáhusevttohus konsešuvdnavuogádagaid birra bieggaindustriija várás. Evttohusas leat konsešuvdnaproseassat veaháš rievdaduvvon, muhto sámediggeráđi oaivila mielde bisuhit dili almmá guđege lágan einnostahttivuođa das, gosa sáhttá ohcat ja hukset bieggaindustriija.

– Sámi kulturbargui ja sámi ealáhusaide čuohcá hui negatiivvalaččat, ja dat guoská erenoamážit sámi boazodollui, dadjá sámediggeráđđi Silje Karine Muotka (NSR), ja čujuha negatiivvalaš vásihusaide Øyfjell-áššis. Dát lea ovdamearka man funet sáhttá mannat bieggaindustriijaáššiin ja proseassain go OED lea diktán huksejeaddji huksegoahtit vaikko konsešuvdnaeavttut bohccuid johtolaga goziheamis guovllus eai leat gozihuvvon.

Sámediggeráđđi oaidná ahte stáhta eiseválddit fertejit vuhtiiváldit dan ahte sámi geavahusguovllut leat guovllut mat leat vuođđun sámi kultur- ja ealáhusgeavahussii.

– Eiseválddit fertejit searvat sámi servodaga doaibmavuođu suodjaleapmái ja geahpedit areálaide sisabahkkemiid mealgat. Eanaš boazoguohtonguovlluin ii leat sadji bieggafápmohuksemii, dadjá Muotka, ja čujuha fylkkamánni raportii: Nasjonal ramme for vindkraft på land. Reindriftsvurderinger av analyseområder som berører samisk reindrift, mii ráhkaduvvui bieggafámu nationála rámma oktavuođas nannámis, ja gos váldoáššis konkluderejuvvo justa nu.

– Retorihkalaš dajaldagat nugo ahte “buohkat fertejit searvat ruoná molsumis” ja sullasaš formuleremat geavahuvvojit dušše dalle go sámi vuoigatvuođaoamasteaddjit ja sámi servodat biddjojuvvojit vel ain stuorát deattu vuollái. Sámediggeráđđi čujuha ahte sámi guovlluide leat juo čuohcan stuorra čáhcefápmohuksemat 60- ja 80-loguin main maiddái ledje stuora negatiivvalaš váikkuhusat. Doarvái lea várra namuhit Álttá-ášši ovdamearkan dasa dadjá ráđđelahttu Muotka.

Go mii dál ovddidat cealkámuševttohusa Stuorradiggái go meannuda bieggaindustriijaášši, de lea danne go Sámediggi ferte addit čielga dieđu Stuorradiggái ahte boazoguohtonareálaid ain gáržudeapmi ii sáhte dohkkehuvvot. Dán cealkámuša sáddet mii buot stuorradiggejoavkkuide, dadjá Muotka.

Jearahallama addá dahje vástida gažaldagaide sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no