Guolástandirektoráhtta lea dál sádden gonagasreappáid regulerenevttohusa gulaskuddamii. Gulaskuddanevttohusa oktavuođas lágidit Sámediggi ja guolástusorganisašuvdna Bivdu rabas gulahallančoahkkima Čáhcesullos golggotmánu 30. beaivvi.

Maŋŋel go Stuorradiggi mearridii ahte buot guolásteaddjit Finnmárkkus galget sáhttit bivdit reappáid bivdoearreregulerejuvvon bivddus Nuorta-Finnmárkkus 2021, rievdaduvvojedje njuolggadusat hui sakka. Goitge bissu ain prinsihppa ahte sis, geaidda gonagasreappát leat giksin sin dábálaš bivddus, galgá lea vuosttaš vuoigatvuohta bivdit reappáid.

– Guolásteddjiid gaskkas lea stuora eahpesihkarvuohta das movt gonagasreabbábivddu ođđa njuolggadusat šaddet, dadjá sámediggeráđđi Silje Karine Muotka ággan dasa ahte manne Sámediggi ja Bivdu lágidit ságastallančoahkkima. Nubbi ágga čoahkkima lágideapmái lea ahte Guolástusdirektoráhtta vuosttaš geardde ii lágit dakkár čoahkkima.

Bivdu lea guolástusorganisašuvdna mii ovdal lea bargan mearraluossaguolástemiin, namain Tana og Omegn Sjølaksefiskeforening (TOS). Dál lea organisašuvnnas mihttun bargat visot mearraguliiguin, ja áigu bargat dan ovdii ahte čalmmustahttit sámiid ja eará riddo- ja vuotnaássiid guolástanrivttiid iežaset guovlluin.

Čoahkkima váldofáddán leat nálledilli, earrerávvagat, márkandilli ja regulerenevttohus.

– Mun sávan ahte buohkat geat sáhttet servet čoahkkimii Čáhcesullos dahje čuvvot čoahkkima neahta bokte, go dál mii háliidit gullat movt guolásteaddjit, álbmot ja hálddahus oaivvildit ahte mii Finnmárkkus galgat hálddašit gonagasreappá resursan Finnmárkkus, dadjá Muotka.

Čoahkkin lea fylkkadiggesálas Čáhcesullos golggotmánu 30. beaivvi dii. 9.30-13.00, ja čájehuvvo maid Sámedikki neahtta-TV:s. Bivdit ahte dieđihat čoahkkimii ovdal disdaga golggotmánu 27. beaivvi ja dieđiheami sádde Bivdi jođiheaddjái Bjarne Johansenii, bjarne.johansen@dinpost.no. 

Jus leat gažaldagat dahje háliidat jearahallat, váldde oktavuođa sámediggeráđiin Silje Karine Muotkain (NSR), tlf. +47 984 87 576, silje.karine.muotka@samediggi.no