Illudahtti go beassá bivdit mearraluosa osiin Finnmárkkus, muhto suddu go buot návccat eai beasa searvat ruoššaluosa jávkadeapmáiSámediggepresideanta Silje Karine Muotka (NSR) dovdá geahpádusa go Dálkkádat- ja birasministtar Espen Barth Eide (Bb) lea vuhtiiváldán ávžžuhusa hilgut regulerenevttohusa, mii livččii bissehan buot mearraluossabivddu Finnmárkkus, muhto livččii maiddái háliidan ahte stáhtaráđđi lei diktit buot mearraluossabivdiid, sihke fylkkas ja olggobealde fylkka, veahkehit ruoššaluosaid jávkadanbarggus. Sámedikkis ja Dálkkádat- ja birasdepartemeanttas leat dán giđa leamaš ollu konsultašuvdnačoahkkimat 2023 luossabivdoreguleremiid birra. Otná konsultašuvnnain, bearjadaga 28.04, deaivvadeigga sámediggepresideanta Muotka ja dálkkádat- ja birasministtar Barth Eide. Sohppojuvvui ahte mearraluossabivdu jotkojuvvo nu go Sámediggi ja Finnmárkku mearraluossabivdit ledje ovdagihtii gáibidan. Bealit eai olahan ovttaoaivilvuođa das ahte ahte galget go mearraluossabivdit, giddejuvvon guovlluin, maiddái beassat searvat ruoššaluosa jávkadanbargui. – Mu mielas galggašii sáhttit buot návccaid ja báikkálaš resurssaid atnit dán dehálaš barggus, dadjá Muotka. Čoahkkimis sámediggepresideanta dovddahii stáhtaráđđái ahte lea fuolas ealáhusa dihte mii vásiha garra deattu ja lea jávkame. – Mii fertet gávdnat buoret čovdosiid ja eará lahkoneami dasa movt bajásšaddi sámi buolvvat galget oažžut oktavuođa iežaset lagasguovlluid riggodagaide. Mii fertet ođđasit hukset min kollektiivvalaš oktavuođa lussii. Dán proseassas lea erenoamáš dehálaš ahte mánát ja nuorat besset leat oassin dan dehálaš kulturárbbis ja das mii guoská luossabivdovieruide buot sámi guovlluin, dadjá Muotka. Oktavuođaolmmoš Sámedikki hálddahusas: ráđđeaddi Vegar Jakobsen Bæhr, tlf: +47 481 81 928, vegar.jakobsen.baehr@samediggi.no Almmuhuvvon 28.04.2023 16.32 Maŋemusat rievdaduvvon 28.04.2023 16.32