– Dat lea buorre ovdáneapmi ja čájeha ahte rekrutterendoaibmabijut doibmet. Sámediggeráđđi lea árabut dán jagi lasihan stipeanddaid sámegielat oahpaheaddje- ja mánáidgárdeoahpaheaddjestudeanttaide, movttiidahttin dihte eambbosiid álgit dáidda oahpuide, dadjá sámediggeráđđi Maren Benedicte Nystad Storslett (NSR).

Dál ožžot studeanttat geat váldet sámi mánáidgárdeoahpaheaddje- dahje oahpaheaddjeoahpu 90 000 ruvnno stipeandan jahkásaččat.

– Dát oahput leat dehálaččat nannet ja seailluhit sámegiela mánáidgárddiin ja skuvllain, lohká Nystad Storslett.

Sámediggeráđđi áigu ain bargat sihkkarastit buriid eavttuid sámegielat studeanttaide ja sámi oahpaheddjiide.

– Mii oaidnit ahte lassánan stipeanddat ja ulbmillaš rekrutterenbarggut buktet bohtosiid. Seammás lea deaŧalaš sihkkarastit buriid rámmaid sámi oahpaheddjiide ja mánáidgárdeoahpaheddjiide, vai eambbogat válljejit bargagoahtit oahpaheaddjin. Dás mii fertet ovttasbargat skuvla- ja mánáidgárdeeaiggádiiguin ja nationála eiseválddiiguin, sihkkarastit buriid bargo- ja bálkáeavttuid oahpaheddjiide ja mánáidgárdebargiide, loahpaha Nystad Storslett.