Sámedikki kantuvra Stuorradikkis galgá earret eará láhčit dili Sámedikki politihkkáriid čoahkkimiidda Stuoradikkis, doaibmat oktavuođaásahussan Stuorradikki lávdegottiide ja bellodatjoavkkuide, fuomášit áššiid ja proseassaid main leat sámi beroštumit, ja gaskkustit máhtu sámi vuoigatvuođaid ja beroštumiid birra láhka- ja mearridanproseassain.
Silje Karine Muotka
Árvu/Sámediggi
– Dat dagaha eanet einnostahtti searvvaheami Sámedikkis ja buoret mearridanvuođu áššiin mat gusket sámi servodahkii, dadjá sámediggepresideanta Silje Karine Muotka (NSR).
Kantuvrra ásaheami duogáš
Sámediggi lea máŋga jagi gulahallan Stuorradikkiin ortnegiid birra mat sáhttet váikkuhit dasa ahte Stuorradikki konsultašuvdnageatnegasvuohta sámi beroštumiid ektui sihkkarastojuvvo. Ášši loktejuvvui fas 2023:s ja maŋŋil meannuduvvui Stuorradikki njuolggaduslávdegottis.
Go Sámediggi oaččui lávdegotti raportta gulaskuddamii, de evttohii sámediggepresideanta ahte Sámedikkis berre leat sierra kantuvra Stuoradikkis sihkkarastin dihtii bistevaš sajádaga. Ášši meannuduvvui dasto ráđđádallamiin Sámedikki ja Stuorradikki presideanttaid gaskka.
Konsultašuvnnaid bokte sohppojuvvui oktasaš áddejupmi das mo guoskevaš sámi beroštusaid ovddasteddjiid galgá searvvahit go Stuorradiggi galgá árvvoštallat doaibmabijuid mat njuolga váikkuhit sámi beroštumiid. Seammás čielggai ahte gažaldat Sámedikki kantuvrra birra Stuorradikkis sáhttá čovdojuvvot hálddahuslaš dásis.
Tommy Somby
Árvu/Sámediggi
Rekruterenproseassa ja virgáibidjan
Sámediggi lea dál ožžon kantuvralanjaid Stuoradikkis. Dan oktavuođas čađahii Sámediggi rekrutterenproseassa virgádit ovtta olbmo Sámedikki oktavuođaolmmožin Stuoradikkis. Virgái ledje gávcci ohcci.
Dál lea čielggas ahte Inga Marie Nymo Riseth Nyseth oažžu virggi. Virgi lea organisatuvrralaččat biddjojuvvon Sámedikki doaibmastivren- ja servodatoktavuođastábii. Bargu lea lahka čadnojuvvon stába ovddasvástádussii Sámedikki fierpmádathuksemii ja strategiijaovddideapmái ásahussan.
– Virgi lea dehálaš sihke strategalaččat ja operatiivvalaččat Sámediggái organisašuvdnan. Inga Márjjás lea hárjáneapmi ja gelbbolašvuohta mii dahká ahte son johtilit sáhttá váikkuhit fierpmádathuksemii, máhttogaskkusteapmái ja buori ovttasdoaibmamii Stuorradikkiin, dadjá Sámedikki doaibmi direktevra Tommy Somby.
Inga Marie Nymo Riseth
Priváhta govva
Nymo Risethas lea mastergráda olmmošvuoigatvuođain ja son lea ovdal bargan Wergelandsenteris, demokratiija- ja olmmošvuoigatvuođaidoahpahusain.
Maŋimus jagiid son lea bargan seniorráđđeaddin Sámedikkis, gos son earret eará lea bargan sámevaši fáttáin, ja lea leamaš oassin Sámedikki joavkkus mii lea čuovvulan Duohtavuođa- ja soabahankommišuvnna raportta.
Inga Marie Nymo Riseth álgá áibbas ođđa rollii. Dál son galgá hukset doaimma vuođu rájes - ja sihkkarastit lagat oktavuođa Sámedikki ja nationála politihkkáriid gaskkas.
– Mu mielas lea gelddolaš bargu, mii lea áibbas ođas. Ulbmil lea nannet oktavuođa Sámedikki ja Stuoradikki gaskka. Ja váikkuhit dasa ahte konsultašuvdnageatnegasvuohta doahttaluvvo, dadjá Nymo Riseth.
Sámedikki kantuvra Stuorradikkis doaibmagoahtá 2026 čavčča rájes.