Sámediggi lea juolludan oktiibuot 400 000 ruvnno guovtti prošektii Internašunála Sámi Filbmainstituhttii. Ruđat leat juolluduvvon Ásahusovddidan doarjjaortnega bokte.

Sámediggi lea juolludan kr. 300 000 ru Internašunála Sámi Filbmainstituhttii álggahan ja čađahan dihte viiddis kártema sámi dáidda- ja kulturásahusaid ruhtadeamis. Ulbmil kártemiin lea čohkket dieđuid sámi dáidda- ja kultursuorggi ovdánaneavttuid birra, ja dasto analyseret makkár struktuvrralaš rievdadusat sáhttet váikkuhit nannoseappo ja sávahahtti ovdáneapmái.

-Dát lea hui ávkkálaš prošeakta. Dainna lágiin sáhttit mihtidit temperatuvrra sámi dáidda- ja kulturásahusain ja maiddái oažžut duođaštuvvot dan dili, dadjá Maja Kristine Jåma (NSR).

Indigenous Film Conference 2023 - Reconciliation and new futures lea ožžon 100 000 ruvnno doarjaga. Filmmakonferánsa lágiduvvo Guovdageainnus borgemánus ja galgá leat filbmasuorggi, kulturpolitihkkáriid ja oaivilčálliid fágabeaivin riikkadásis ja riikkaidgaskasaččat. Šaddá ollesbeaivásaš boahtteáiggedoaimmahat iešguđetlágan bargobájiin ja čájáhusaiguin, ja rabas beaivi báikegoddái čájáhusaiguin ja interaktiivvalaš doaimmaiguin.

Duohtavuođa- ja seanadankommišuvnna raportta olis háliida ISFI váldit stuora ovddasvástádusa čalmmustahttit sámi historjjáid ja perspektiivva seanadanproseassas, ja nannet sámi filbmadahkkiid vejolašvuođaid sihke sisriikkalaččat ja riikkaidgaskasaččat.

- Konferánsa sáhttá šaddat ođđa ja ođasmahtti vuohkin bidjat guovddážii ii dušše min iežamet sámi muitalusaid muitaleami, muhto maiddái álgoálbmothistorjjáid muđui, masa lea erenoamáš deaŧalaš dál bidjat fuomášumi, dadjá sámediggeráđđi Maja Kristine Jåma.

- ISFI áigu dáinna konferánssain maiddái ráhkadit riikkaidgaskasaš deaivvadansaji máhttoovddideapmái ja vásáhusaid juogadeapmái rastá máilmmi ja árktalaš álgoálbmotmáilmmi, ja dát váikkuha dasa ahte sámi filbma ja Sápmi bohtet vel buorebut oidnosii, dadja Maja Kristine Jåma (NSR).