– Mii leat ilus go beassat doarjut njeallje hirbmat čeahpes sámi nuora Sámedikki 2024 kultur- ja valáštallanstipeanddain. Dát stipeanddat leat mielde ovddideame sin kultuvrras ja valáštallamis. Mii illudit oaidnit maid sii buktet min kultuvrralaš searvevuhtii, dadjá sámediggeráđđi Maja Kristine Jåma (NSR).
Dán jagi lea Karin Alida Boine, Elisa Götch Iversen ja Daniel Ailo Sakshaug Bær geat ožžot valáštallanstipeandda ja Linus Johnsen oažžu kulturstipeandda.
Sámedikki kultur- ja valáštallanstipeandda ulbmil lea movttiidahttit sámi nuoraid aktiivvalaččat oassálastit dáidagii, kultuvrii ja valáštallamii.
– Lea somá beassat doarjut čeahpes nuorra taleanttaid geat ovddastit máŋggabealatvuođa kultuvrra ja valáštallama siskkobealde. Mii sávvat sidjiide buot lihku, dadjá sámediggeráđđi Jåma.
Dán jagi bohte oktiibuot 22 ohcama mat devde stipeandaortnega eavttuid, ja 17 dain ledje valáštallanstipeandaohcama ja 5 ledje kulturstipeandaohcama.
Sámediggeráđđi bidjá merkii ahte eanetlohku dán jagáš ohcamiin ja stipeanddain leat valáštallantaleanttat. Dat čájeha dan stuorra beroštumi sámi nuoraid gaskkas valáštallamii.
Oanehaččat dán jagáš stipeandavuostáiváldiid birra:
Valáštallanstipeanda:
Karin Alida Boine lea 25 jagi, ja lea čájehan hirbmat taleantta sumoheaibumis. Dál lea son buoremusaid searvvis nationála dásis. Son ovddasta Norgga ja Sámi dán erenoamáš heaibunvaláštallamis sihke nationálalaččat ja riikkaidgaskasaččat. Dán jagi lea son vuoitán golli joavkogilvvus ja silbba individuála heaibumis Norggameašttirgilvvuin. Dán jagáš Eurohpámeašttirgilvvuin bođii son 5. sadjái lossadeaddoluohkás. Dát olahusat leat kvalifiseren su eambbo riikkaidgaskasaš gilvvuide, gos son gilvala muhtin máilmmi buoremus sumoheaibuiguin. Borgemánus lei son Skottlánddas Scottish openis, gos son fiškalii njealját saji. Son lea maiddái vuohččan searvan máilmmimeašttirgilvvuide sumos, gos son deaivvadii máilmmi buoremusaiguin lossadeattus.
Elisa Götch Iversen lea 20 jagi ja lea mánnávuođa rájes gilvalan meahccedádjadeamis. Dán jagi lea son sakka ovdánan meahccedádjadeamis, ja dán áigodaga buoremus olahus lei ge silba junior-VM:s, Tjekkias. Sus leat ovdalaččas máŋga NM-medállja, mas 3 leat gollit. Maŋemus golli, maid vuittii junior-NM stafeahtas ruovttus Romssas, vuittii son fárrolaga iežas unnaoappážiin. Dássážii lea son leamaš juniorriikajoavkkus, muhto boahtte jagi lávke son seniorluohkkái, juoga mii sáhttá leat gáibideaddji.
Daniel Ailo Sakshaug Bær lea 18 jagi ja čiekčá TIL ovddas. Son vázzá NTG:s ja lea goalmmát jagi čiekčame TIL-Akademiet ovddas. Son lea maiddái debuteren TIL A-joavkkus cupa vuosttaš vuorus, ja lea leamaš mielde A-joavkkus Eliteseries Odd vuostá. Daniel lea leamaš áŋgiris spábbačiekči IL Nordlysas dan rájes go lei njeallje jahkásaš. Vaikko lea dušše 18 jagi, de lea son bissovaš čiekči TIL 2 4. divišuvnnas ja G19-joavkkus, ja lea dán áigodaga leamaš okta jotkkolašvuođaguddiin. Su mihttomearri lea beassat TIL A-jovkui boahtte áigodaga. Daniela ovdagovat leat Hans Norbye, Morten Gamst Pedersen ja Sigurd Rushfeldt, geat buohkat leat Finnmárkulaččat. Iežas boazodoalloduogážiin lea son olahan guhkás, ja sávvá ahte son iežas olahusaiguin movttiidahttá eará sámi nuoraid.
Kulturstipeanda:
Linus Johnsen lea 21 jahkásaš artista ja lávllačálli Dielddanuoris eret. Linus buvttada sámi pop-musihka masa viežžá inspirašuvnna prog-rockas, ja mas luođis lea guovddáš rolla. Jagis 2023 lei son mielde Sámi Grand Prixas lávlagiin ”Cevzoset hilat”, ja dál son ásaiduvvá artistan seammás go studere musihka Romssas. Su musihkka lea maiddái čuojahuvvon NRK P3 Urørtas. Linus lea buorre ovdagovva eará sámi nuoraide.
Sámedikki kultur- ja valáštallanstipeandda ovddeš vuostáiváldit:
2022:
Valáštallanstipeanda: Ine Mariell Trane Porsanger ja Jonna Johanne Dunfjeld Mølnvik.
Kulturstipeanda: Leander A. Gilsåmo ja Iris Storelv-Rabone.
2021:
Valáštallanstipeanda: Anders Inga ja Stine Lise Nordsletta Somby.
Kulturstipeanda: Jon Mika Nystad Eskonsipo ja Maret Julianne Gaup.
2020:
Valáštallanstipeanda: Amalie Storelv, Olivia Braastad.
Kulturstipeanda: Peder Niilas Tårnesvik, Emil Nikolaus Karlsen, Lávre Johan Eira.
2019:
Valáštallanstipeanda: Amalie Kristine Triumf, Peder Funderud Skogvang, Tuva Sirin Schall Mikkelsen.
Kulturstipeanda: Ánna-Kátri Helander.
2018:
Valáštallanstipeanda: Benedicte Guttorm ja Sajane Karina Olsen.
Kulturstipeanda: Anna Kaisa Partapuoli ja Johan Daniel Turi.
2016:
Valáštallanstipeanda: Rakel Birkeli ja Jan Arthur Reinås.
Kulturstipeanda: Anna Linnea Fjellheim Varsi ja Ella Marie Hætta Isaksen.