– Dát lea stuora supmi midjiide, muhto mis lea doaivva ahte dát prošeakta sáhttá váikkuhit dasa ahte šaddá positiivvalaš ovdáneapmi máŋga borramuš- ja mátkeealáhusfitnodahkii Donjevuonas, Gilivuonas, Gáŋgaviikkas, Idjavuonas, Davvesiiddas ja Gussanjárggas. Čorgašis leat olu biebmoresurssat ja go lokte báikkálaš biepmu olles guovllus, de sáhttá olahit olu, dadjá sámediggepresideanta Silje Karine Muotka (NSR).

Dát lea golmmajahkásaš prošeakta, muhto Sámedikki doarjja guoská dušše vuosttaš jahkái. Sámedikki mearrádusas lea biddjon eaktun ahte ii sáhte vuordit ahte Sámediggi juolluda ruđaid olles prošeaktaáigodagas.

– Mii leat addán dieđu Visit Nordkynii ahte Sámediggi vuoruha dan vuosttaš oasi prošeavttas, ja ahte prošeaktaeaiggádiin lea ovddasvástádus ráhkadit sierra ruhtadanplánaid guovtti maŋemus jahkái. Seammás jáhkkit ahte dát prošeakta sáhttá váikkuhit dasa ahte oasseváldefitnodagat Gáŋgaviikkas ja Davvesiiddas bohtet johtui juohkehaš iežas ovdánanprošeavttain, ja ahte dain de lea fas iežaset prošeavttaid bokte vejolašvuohta ohcat doarjaga, dadjá Muotka.

Juolludeapmi addo doarjjaortnegis Máŋggabealálaš ealáhusat, ja prošeakta lea ožžon dan maid lea eanemus vejolaš oažžut doarjjan ortnegis. Innovašuvdna Norga doarju maid prošeavtta ruđalaččat.

Visit Nordkyn lea ideála searvi Davvesiidda ja Gáŋgaviikka gielddaid mátkkoštanealáhussii. Ulbmil lea márkanfievrredit ja ovddidit Čorgaša ja Davvesiidda turistadestinašuvdnan.