NFF Finnmárku lea ožžon 400 000 ru prošektii Mii-Met-Vi: Spábbačiekčamis servodahkii. Prošeakta galgá nannet sámi giela, identitehta ja searvevuođa mánáid ja nuoraid gaskkas Finnmárkkus.
Prošeakta álggahuvvui spábbačiekčamis, gos dat leat váikkuhan eanet árvvusatnimii, oadjebasvuhtii ja rámisvuhtii. Bargu ovddiduvvo dál viidáset vai fátmmasta maiddái skuvllaid ja báikegottiid.
Maren Benedicte Nystad Storslett
Árvu/Sámediggi
– Spábbačiekčama bokte leat mánát ja nuorat beassan vásihit ahte sámi giella ja identitehta lea givrodat. Go ollugat ain deaividit sámevaši ja ovdagáttuid, de lea dehálaš doarjut doaibmabijuid mat huksejit árvvusatnima, máhtu ja searvevuođa. Jus mii galgat lihkostuvvat oažžut oadjebas Sámi buohkaide, de ferte miellaguoddobargu álggahuvvot doppe gos mánát ja nuorat deaivvadit, dadjá sámediggeráđđi Maren Benedicte Nystad Storslett (NSR).
Ovddos AS lea ožžon 350 000 ru Sápmi Business Arenai, deaivvadanbáikin sámi fitnodagaide, ealáhusaktevrraide ja organisašuvnnaide miehtá Sámi. Arenai gullet earret eará Sápmi Business Conference ja Sápmi Business Hackaton. Prošeakta galgá nannet fitnodathutkama, innovašuvnna ja ovttasbarggu riikarájáid rastá sámi guovlluin.
Árran julevsáme guovdásj AS lea ožžon 250 000 ru sámi rumbbuid dutkan- ja duođaštanprošektii. Prošeakta galgá addit ođđa máhtu julev- ja bihtánsámi goabddá (rumbbuid) birra ja kulturhistorjjálaš mearkkašumi birra dokumentašuvnna ja analysaid bokte Norgga, Ruoŧa ja Englándda museain.
Finnmarksløpet AS lea ožžon 75 000 ru juoigangilvui man boađus galgá leat “Finnmarksløpets joik”. Eaktun lea biddjon ahte prošeavttas lea sámi luohte gelbbolašvuohta, nu ahte gilvu čađahuvvo dohkálaš dáiddalaš vuogi mielde.
– Prošeavttat čájehit sámi servodatbarggu viidodaga. Dat leat mielde nannemin giela ja identitehta mánáid ja nuoraid gaskkas, ovddidit sámi ealáhusaid ja huksejit ođđa máhtu min kulturárbbi birra, dadjá Nystad Storslett.
Ohcanáigemearri Regionála ovddidanprošeavttaid doarjjaortnegis lea skábmamánu 3. beaivvi 2026, tiibmu 15.30.
Juolluduvvon doarjagat: