Davvi Girji AS áigu ođđasit deaddilit Egil Utsi girjji “Medisinsk lommeparlør: norsk-samisk”. Girji deaddiluvvui vuosttaš geardde 1998:s, muhto dat ii leat šat oažžumis girjin.
– Girji lea dehálaš veahkkeneavvu dearvvašvuođabálvalusas ja berre leat olámuttos dearvvašvuođabargiide miehtá riikka. Dát veahkkeneavvu sáhttá váikkuhit dasa ahte sámi álbmot oažžu buoret dearvvašvuođabálvalusaid, go pasieanta váldojuvvo vuostá sámegielain. Lágádusas eai šat leat eanet dákkár girjjit, ja danne lea hui buorre ahte girji deaddiluvvo ođđasit, dadjá sámediggeráđđi Runar Myrnes Balto (NSR).
Dan dihte go girji deaddiluvvui vuosttaš geardde 1998:s, de lea dárbu heivehit girjji dálá áigge hábmemii, dihtor- ja deaddilanvuogádagaide ovdal go dat deaddiluvvo.
104 500 ruvdnosaš doarjja addo doarjjaortnegis Doarjja dearvvašvuođa-, fuolahus- ja mánáidsuodjalusprošeavttaide.
Doarjja julevsámi dearvvašvuođajoavkku ovdaprošektii
Runar Myrnes Balto
Árvu/Sámediggi
Seamma doarjjaortnegis juolluduvvo maid 171 000 ruvdnosaš doarjja Hábmer suohkanii, mii áigu ásahit julevsámi dearvvašvuođajoavkku mii galgá áimmahuššat sámi pasieanttaid, sin oapmahaččaid ja julevsámi báikkálašservodaga. Prošeakta galgá huksejuvvot lullisámi dearvvašvuođajoavkku Saemien healsoedåehkie málle mielde ja eará álgoálbmotguovlluid málliid mielde.
– Sámi dearvvašvuođajoavkku bokte lea vuogas áimmahuššat sámi pasieanttaid ja guovllu álbmoga, nu ahte bálvalus dainna lágiin šaddá eanet olámuddui julevsámi álbmogii, dadjá Myrnes Balto.
– Dehálaš ovdaprošeakta
Sámediggeráđđi oaivvilda ahte dearvvašvuođavuogádat maid sápmelaččat áimmahuššet, ahte bálvalusas lea doarvái sámi gelbbolašvuohta ja ahte sámi giella ja kultuvra váldojuvvo mielde bálvalussii lea dehálaš addin dihte sámi álbmogii seammaárvosaš dearvvašvuođabálvalusaid.
– Dát lea maid dehálaš go jurddaša bálvalusa pasieantasihkarvuođa ja kvalitehta birra, dadjá Myrnes Balto.
Julevsámi dearvvašvuođafierpmádat Julevsáme Varresvuodaværmdahka, Hábmera suohkana ja Nordlánddabuohcceviessu dat ásahit julevsámi dearvvašvuođajoavkku, ja sii leat maid prošeaktaeaiggádat.
Jearahallama addá dahje vástida gažaldagaide sámediggeráđđi Runar Myrnes Balto (NSR), +47 977 73 778, runar.myrnes.balto@samediggi.no