– Guorahallan NAČ 2016:18 Váibmogiella lea cealkán ahte sámegielat mánáidgárddit leat dehálaš eaŋkildoaibmabidju vai sáhttá seailluhit ja ealáskahttit sámi gielaid, lohká sámediggeráđđi Mikkel Eskil Mikkelsen (NSR).

Oktiibuot leat 572 máná geat ožžot mánáidgárdefálaldaga mas leat vuođđun sámi árvvut, giella, kultuvra ja árbevirolaš máhttu. Mánnálohku juohkása ná: 18 máná ožžot lullisámegielat mánáidgárdefálaldaga, 39 máná ožžot julevsámegielat mánáidgárdefálaldaga ja 515 máná ožžot davvisámegielat mánáidgárdefálaldaga.

Sámi mánáidgárddiid ja sámi ossodagaid doarjjaortnega mihttomearri lea ahte sámi mánáidgárddiin ja sámi ossodagain norgalaš mánáidgárddiin ohppet sámi mánát sámegiela ja sámi kultuvrra ja árbevieruid birra.  Doarjja galgá earret eará geavahuvvot doaimmaide mat ovdánahttet ja nannejit sámi árvvuid, giela, kultuvrra ja árbevirolaš máhtu.

Dát doarjjaortnet lea ohcanvuđot, ja dábálaččat lávejit leat oktiibuot 32 mánáidgárddi mat ožžot doarjaga dán ortnega bokte. Dán jagi leat 8 mánáidgárddi mat eai leat ohcan doarjaga. Ohcanáigemearri lea dábálaččat miessemánu 2. beaivvi, muhto dán jagi guhkiduvvui ohcanáigemearri miessemánu 19. beaivvi rádjái vai buot mánáidgárddit ollejit ohcat.

– Mun dieđán ahte dát doarjja lea dávjá dat mii addá mánáidgárddiide vejolašvuođa nannet giellabarggu ja maid sámi sisdoalu, dan dihte leat mii geahččalan muittuhit ohcanáigemeari mánáidgárddiide, lohká Mikkelsen.

Sámediggeráđđi lea álggahan barggu rievdadit doarjjaortnega dál ja Mikkelsen lohká ahte dá lea bargu maid áigot vuoruhit ovddosguvlui.

Bajilgovva guđe sámi mánáidgárddit ja sámi ossodagat dáčča mánáidgárddiin leat ožžon doarjjajuolludeami dássážii 2023:s: (PDF, 141 kB)

Doarjja giellaoahpahussii mánáidgárddiin

Mánáidgárddit sáhttet maid ohcat doarjaga sámegieloahpahussii. Dássážii lea juolluduvvon oktiibuot badjelaš 313 000 ruvdnosaš doarjja mii lea juogaduvvon njealji mánáidgárdái.

Giellaoahpahusdoarjaga mihttomearri lea ahte mánáidgárddit oahpahit sámi mánáide sámegiela. Dán doarjjaortnegis lea rabas ohcanáigemearri, mii mearkkaša ahte mánáidgárddit sáhttet ohcat ja oažžut juolluduvvot doarjaga gitta dii 15.00 čakčamánu 1. beaivvi rádjái.

Dássážii dán jagi leat guokte ođđa mánáidgárddi ohcan doarjaga giellaoahpahussii. Vihtta máná ožžot dál giellaoahpahusa vuohččan Storfjord Naturbarnehage AS Omasvuonas ja Birkebeineren friluftsbarnehage Lillehammeris.