Sámediggi lea meannudan 10 duodjestipeandaohcamuša ja lea juolludan oktiibuot 170 000 ruvnno bušeahtas, mas lei 190 000 ruvnno. Duodjestipeanda addo oktii jagis, ja dán jagi leat ovcci nissonolbmo ja okta dievdoolmmoš ožžon stipeandda. Sii leat ožžon stipeandda dan mielde galle oahppočuoggá leat čađaheamen. Lea addon 15 000 ruvnnu 30 oahppočuoggá ovddas ja 25 000 ruvnnu 60 oahppočuoggá ovddas.

Dát stipeanddat leat dehálaš oassi Sámedikki barggus doarjut ja ovddidit duoji.

– Duodjestipeanddat leat dehálaččat seailluhit ja viidáseappot ovddidit min rikkis kulturárbbi. Dáid stipeanddaid bokte mii sáhttit sihkkarastit ahte duodjemáhttu ja gelbbolašvuohta sirdojuvvo ođđa buolvvaide. Min mihttomearri lea nannet sámi identitehta ja kultuvrra aktiivvalaš doarjaga bokte min boahttevaš duojáriidda, cealká sámediggeráđđi Elisabeth Erke (Gb).

Stipeandaortnega mihttu lea lasihit olbmuid logu geain lea formála gelbbolašvuohta duojis.

Vuoruhemiide 2025:s gullet joatkkaskuvlaoahppit geat ollesáiggis lohket Jo1 Design ja giehtaduoji dahje Jo2 Design ja giehtaduoji, ja Norgga beal studeanttat geat ollesáiggis lohket duoji Sámij Åhpadusguovdátjis Johkamohkis, dahje duoji bachelor- ja masterdásis Sámi allaskuvllas.