Sámi giellavahkku lea vahkku mas sámegielat ávvuduvvojit, loktejuvvojit oidnosii ja ealáskahttojuvvojit iešguđetlágan doaimmaid bokte miehtá riikka. 

Sámedikki doarjaga mihttu lea čalmmustahttit ja váikkuhit dasa ahte sámegielaid geavaheapmi lassána servodagas. Doarjja lea vuoruhuvvon doaibmabijuide mat láhčet dili nu ahte sihke mánát, nuorat ja rávisolbmot besset gullat ja oahppat sámegiela Sámi giellavahku oktavuođas.

Sámediggi lea earret eará juolludan doarjaga nuppelohkái skuvlii ja mánáidgárdái Girkonjárgga rájes Oslove rádjai, nu ahte sii besset lágidit gielladoaimmaid main leat sámi árbevierut, barggut, borramušat ja báikenamat guovddážis oahpaheamis.

– Lean giitevaš ja movttet dan stuorra áŋgiruššama ovddas maid giellavahku doarjjaohccit leat čájehan, dadjá sámediggeráđđi Maren Benedicte Nystad Storslett (NSR).

Nordlánddas leat áŋgiris giellaberošteaddjit ožžon doarjaga. Okta dain lea Sálat Sámesearvi, gii ovttas Sáltto bihtánsámeservviin ja Nordlándda álbmotmeahcceguovddážin áigu ovddidit bihtán- ja davvisámegiela. Dan dahket logaldallamiid ja doaimmaid bokte main birgejupmi ja ceavzilvuohta lea guovddážis. Nubbi lea ges Aile Heatta Kuhmunen Davvi-siiddas Sáltoduoddaris, gii lea ožžon doarjaga oahpahit sámegiela ja seailluhit árbevirolaš máhtu ja kultuvrra luovveceggema, ságastallamiid ja eará doaimmaid bokte.

Sámediggi lea maid dorjon Vakkerøya Tour & Event By Ekman, mii vuosttaš geardde lágida giellavahku doaimmaid Ivvárstádik (Ibestad) suohkanis, fárrolaga earret eará Lulli Romssa museain ja ovddeš sámi ofelaččaiguin.

Sámediggi lea maid dorjon Rossen tjïelte lágiidit Gïelevåhkoe 2025. Sii áigot ovttasbarget Aajege giella- ja kulturguovddážiin ja Plassje museain čalmmustahttit ja nannet máhtu sámegielaid birra olles servodagas.

– Dat ollu gielladoaibmabijut duođaštit ahte gávdno sihke dáhttu, doaivva ja hutkáivuohta seailluhit ja ovddidit sámegielaid. Dát addá midjiide jáhku boahtteáigái, ahte mii ovttasbargguid bokte sáhttit olahit servodagaid gos lea vejolašvuohta oahppat, geavahit ja ovddidit váibmogielaidasamet.

Giellavahkus lea sierra neahttasiidu, https://giellavahkku.org/, gosa doarjjavuostáiváldit almmuhit dieđuid sin giellavahku doaimmaid birra. Doppe sáhttá lohkat mii dáhpáhuvvá gos ja goas, ja leat go rabas doaimmat ja doalut maidda sáhttá searvat.

– Ávžžuhan buohkaid sihke searvat Giellavahku doaimmaide ja ieža leat mielde lokteme sámegielaid giellavahku oktavuođas, loahpaha sámediggeráđđi Nystad Storslett.