Gaavalohke mánáidgárdi Raarvihken tjïeltes lea ohcan doarjaga sámi giellaresursii, ruđat galget mannat bálkái giellamovttiideaddjái. Sii ožžot 300 000 ruvnno doarjjan. Giellaresursa galgá veahkkin nannet sámegiela ja sihkkarastit ahte mánát šaddet sámegielagin.
– Dát lea áidna sámi mánáidgárdi gos gullo sihke davvi-, julev- ja máttasámegiella mánáidgárdeárgabeaivvis, ja mánáidgárdi lea giellarikkis. Sávan sidjiide lihku prošeavttain, dadjá sámediggeráđđi Mikkel Eskil Mikkelsen (NSR).
Badjemánáid Beaiveruoktu Kárášjogas lea ohcan ruđaid prošektii mii galgá ovddidit, nannet ja čalmmustahttit sámi árbevirolaš doahpagiid praktihkalaš barggu bokte. Sii ožžot 291 000 ruvnno doarjjan. Mánáidgárdi háliida prošeavttain loktet sámi giella- ja kulturbarggu kvalitehta. Ruhta galgá earret eará mannat sámi resursaolbmuid bálkáheapmái, pedagogalaš ávdnasiid ja geavahusávdnasiid oastimii. Dát mánáidgárdi lei okta pilohtamánáidgárddiin Sámedikki mánáidgárdeprošeavttas SáMOS, man ulbmil lei rievdadit sámi mánáidgárdestruktuvrra sámi filosofiija ja árbedieđu vuođul. Prošeakta loahpahuvvui geassemánus 2023.
– Illudahttá mu go oainnán ahte mánáidgárdi joatká barggu heivehit sámi pedagogalaš prinsihpaid ja nana giellaoahpahusmodeallaid sin doaimmaide, dadjá Mikkelsen.
Kavringen mánáidgárdi ja Lyngsdalen oppvekstsenter mánáidgárdeossodat Ivggu suohkanis leat ohcan ruđaid sámi kultuvrra ealáskahttimii ja giellaprošektii. Oktiibuot ožžot sii 600 000 ruvnno doarjjan. Prošeavttain háliidit váldit ruovttoluotta sámi giela ja kultuvrra. Mánáidgárddit háliidit maiddái buoridit mánáid ja bargiid máhtolašvuođa báikkálaš sámi kultuvrra ja giela birra, ja dieinna lágiin leat mielde nanneme mánáid sámi identitehta. Ruđat galget geavahuvvot earret eará sámi resursaolbmuide ja bargiid gelbbolašvuođaloktemii.
– Dát lea gelddolaš prošeakta! Lea buorre oaidnit ahte Ivgu suohkan lea váldigoahtán sámi giela ja kultuvrra ruovttoluotta, ja ahte ealáskahttinbargu álggahuvvo aiddo mánáidgárddis. Mánáidgárddis han lea stuorámus vejolašvuohta lihkostuvvat váldimiin ruovttoluotta sámi giela ja kultuvrra, dadjá Mikkelsen.
Dát leat dušše muhtumat buot 27 prošeavttas mat leat ožžon doarjaga. Juolludusat addojuvvojit doarjjaortnega bokte Doarjja prošeavttaide ja ovddidanbargui mánáidgárddiin. Ortnega mihttomearri lea alla kvalitehta sámi giella- ja kulturbarggus mánáidgárddiin. Boahtte áigemearri ohcat doarjaga dán ortnegis lea golggotmánu 2. beaivve 2024 dii. 14.00.
Ođđajagimánu 1. beaivvi 2024 rahppojuvvojit Sámedikki doarjjaortnegat jahkái 2024.
Ollislaš listu buohkain geat leat ožžon doarjaga ortnegis Doarjja prošeavttaide ja ovddidanbargui mánáidgárddiin 2023:
Suohkan | Mánáidgárdi | Prošeakta | Juolluduvvon |
Kárášjoga gielda | Badjemánáidbeaiveruoktu SA | SáMOS 2022 | 300 000,- |
Gáivuona suohkan | Goržži mánáidgárdi | Sámegieloahpahus musihka ja lávluma bokte Goržži mánáidgárddis | 265 000,- |
Álttá suohkan | Læringsverkstedet Furua barnehage AS | Giella ja kulturgaskkusteapmi olggustallamiin duogážin | 126 977,- |
Álttá suohkan | Talvik oppvekstsenter avdeling barnehage | Báikkálaš ovddidanprošeavttat main sámi árbevirolaš bargu deattuhuvvo | 191 559,- |
Tråanten tjïelte | Lekeplassen barnehage AS | Reaiddut ja konkrehtat sámi kulturgaskkusteapmái, lágideamit vánhemiidda ja mánáide, buoret gelbbolašvuohta bargiin, oažžut sámi lávlagiid ja musihka mánáidgárdái | 43 444,- |
Rossen tjïelte | Brekken barnehage | Gielladoaibmabijut mánáidgárdemánáide | 300 000,- |
Álttá suohkan | Nyland studentbarnehage AS | Sámi kultur- ja giellavásihusaid nannen | 119 830,- |
Dielddanuori suohkan | Márkománák sámi mánáidgárdi | Giellanannen ja giellaovddideapmi Márkománák sámi mánáidgárddis | 300 000,- |
Rossen tjïelte | Luvlege maanagierte | Oahppanarena geavaheapmi olggobealde mánáidgárddi | 59 000,- |
Álttá suohkan | Áltta siida AS | Viidásetovddidit sámi pedagogihka ja metodihka mánáidgárddis | 300 000,- |
Bådåddjo suohkan | Jentoftsletta barnehage | Sámi resursaolmmoš | 300 000,- |
Guovdageainnu suohkan | Gili mánáidgárdi | Sámi árbevirolaš barggut | 130 000,- |
Álttá suohkan | Tverrelvdalen barnehage | Ovddidanbargu mas sámi árbevirolaš bargu deattuhuvvo Tverrelvdalen mánáidgárddis | 40 000,- |
Tråanten tjïelte | Nordosletta barnehager | Mo oainnusmahttit sámi kultuvrra min beaivválaš pedagogihkas. Resurssat bargiid ja ávdnasiid friddjaoastimii. | 50 000,- |
Melhus suohkan | Hovin barnehage | Sámi giella | 55 000,- |
Deanu gielda | Giellavealgu AS | Giella ja árbi giehtalagaid | 290 000,- |
Kárášjoga gielda | Badjemánáidbeaiveruoktu SA | Ovdánahttit, nannet ja čalmmustahttit árbevirolaš doahpagiid bargguid vuođul. | 291 000,- |
Ivgu suohkan | Kavringen barnehage | Sámi kultuvrra ja giela ealáskahttin mánáidgárddis | 300 000,- |
Ivgu suohkan | Lyngsdalen oppvekstsenter avd barnehage | Sámi kultuvrra ja giela ealáskahttin mánáidgárddis | 300 000,- |
Oslo suohkan | Cizáš sámi mánáidgárdi | Julevsámi ja lullisámi giellaovddidanprošeakta | 137 128,- |
Rossen tjïelte | Luvlege maanagierte | Sámástahtte | 290 000,- |
Lodega suohkan | Læringsverkstedet Lørdingen barnehage AS | Sámegielat mánáidgárdefálaldat | 73 500,- |
Raarvihken tjïelte | Gaavalohke | Sámegielat giellaresursa | 300 000,- |
Guovdageainnu suohkan | Máze mánáidgárdi | Sámi árbevirolaš duddjon vuogit ja sánit | 72 000,- |
Hársttáid suohkan | Læringsverkstedet Løvåsen idrett og friluftsbarnehage AS | Eanet gelbbolašvuohta ja ruđat sámi giellaoahpahussii | 64 000,- |
Rana suohkan | Tullas Hage AS | Sámegiella mánáidgárddis: Lullisámi giella- ja kulturoahpahus Ranas | 226 140,- |
Hámmerfeastta suohkan | Håja barnehage | Kultuvrralaš doaimmat | 58 000,- |
| | SUPMI | 4 982 578,- |