Anna-Marja Persson lea ožžon 150 000 ruvdnosaš doarjaga ráhkadit 5. sesoŋŋa eamiálbmotpodkastta Samesystrar. Prošeakta deattuha logi erenoamáš sámi nissona dán podkasttas. Nissonolbmot bohtet iešguđet guovlluin Sámis, ja ovddastit iešguđet beliid sámi eallimis. Sis leat buohkain iešguđetlágan vásáhusat ja duogáš. Prošeakta galgá váikkuhit dasa ahte sámi eallin ja kultuvra čalmmustahttojuvvo, ja čájehit Sámi girjáivuođa dáid nana sámi nissonolbmuid muitalusaid bokte.

- Podkasta lea dehálaš veahkki almmolaš ságastallamii, ja erenoamážit deattuha nissonolbmuid mearkkašumi sámi servodagas. Dat lea bures beaggán miehtá Sámi, dadjá sámediggeráđđi Maja Kristine Jåma (NSR).

Elle Sofe Company AS lea ožžon 150 000 ruvdnosaš mátkedoarjaga Kanada turnéai 2024:s. Elle Sofe Company lea bovdejuvvon stuorát turnéai Kanadai 2024 dálvvi, čájehit čájálmasa Vástádus eanan - The answer is land canadalaš gehččiide Edmontonis, Calgarys, Vancouveris, Ottawas ja Torontos, ja de leat erenoamážit álgoálbmogat oláhusjoavkkus.

- Čájálmas lea ožžon sihke našunála ja internašunála rámi, ja gaskkusta deaŧalaš sága eana- ja čáhcevuoigatvuođaid birra. Dat mii dáhpáhuvvá min eatnamiiguin váikkuha midjiide maiddái olmmožin, dadjá Jåma.

Dasa lassin leat vihtta eará prošeavtta ožžon oktiibuot 176 100 ruvdnosaš doarjaga.

Sámedikki doarjjaortnega mihttomearri kulturdoaimmaide leat buorit rámmaeavttut sámi dáiddabuvttademiide ja kulturvásihusaide. Ortnegis lea rabas ohcanáigemearri gitta skábmamánu 1. beaivvi rádjai dán jagi.

Juolludusat kulturdoaimmaide, suoidnemánnu 2023: