Norgga Biibbalsearvi oažžu 300 000 ruvnno doarjjan jorgalit Boares testameantta julevsámegillii. Biibbalsearvi lea máŋga jagi badjel ožžon doarjaga Boares testameantta jorgalanbargui. Norgga biibbalsearvi ovttasbargá Ruoŧa biibbalservviin, Ruoŧa Girkuin (Ruoŧa girku girkostivra ja sámi ráđđi) ja Norgga girku sámi ráđiin. Prošeavttas leat maid nanu giellagelbbolašvuohta go eatnigielagat leat veahkkin.

– Lea olbmo vuoigatvuohta beassat atnit sámegiela maiddái go lea sáhka oskkus. Biibaljorgalanbarggus maid ráhkaduvvojit ođđa tearpmat ja giella normerejuvvo. Sámediggi lea ge juo máŋga jagi juolludan doarjaga jorgalanbargui, ja oaidná ahte lea áin dehálaš juolludit doarjaga, vai biibaljorgalanbargu ii gaskkalduva, dadjá sámediggeráđđi Mikkel Eskil Mikkelsen (NSR).

Rock Pocket AS lea dáru spealloovdánahtti mii lea ohcan doarjaga jorgalit Voidcast-nammasaš dihtorspealu davvisámegillii. Sámediggeráđđi lea juolludan 300 000 ruvnno doarjjan jorgalanbargui. Fitnodat háliida ahte olles Norga, maiddái sámevuohta, sámi kultuvra ja sámegiella, galgá leat oidnosis máilmmis. Sii maiddái vuhttet ahte servodagas leat unnán sámegielat speallofálaldagat mánáide ja nuoraide.

– Servodagas eat leat sámegielat nu oidnosis digitála arenain gos mánát ja nuorat leat. Gielaid boahttevaš árvvu hárrái lea dehálaš ahte prográmmat, spealut ja applikašuvnnat gávdnojit sámegillii. Dan dihte háliida sámediggeráđđi doarjut dákkár prošeavttaid, dadjá Mikkelsen.

Sámediggeráđđi lea maid juolludan 102 700 ruvnno doarjjan UiT Norgga árktalaš universitehtii go áigot čađahit oahppomátkki Sis-Finnmárkui. UiT Romssa árktalaš universitehta fállá sámegiela amasgiellan studeanttaide ja dan oktavuođas áigot čađahit oahppomátkki Sis-Finnmárkui, gos studeanttat besset vásihit sámegielat birrasa ja sámi ásahusaid. Mátkki ulbmil lea ahte studeanttat galget nannet iežaset sámegiel sátnevuorkká ja njálmmálaš giela ja seammás besset gullat ja atnit sámegiela lunddolaš diliin, nugo gávppis.

– Giellaoahppamis lea nu ahte mađi eanet ieš atná ođđa giela, dađi eanet oahppá ja šaddá álkibun geavahit giela beaivválaččat, čilge Mikkelsen. 

Dát golbma doarjaga oktiibuot 702 700 ruvnno ovddas juolluduvvojit doarjjaortnegis Giellaovddidandoaimmat.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no