Sámiráđđi/Saami Council lea ožžon 190 000 ruvnno lágidit jahkásaš KulturSápmi dearvvadeami kultursuorgái, sámi kulturbargiide ja hutkás ealáhussii, mii lágiduvvo dán jagi njealját geardde.
– KulturSápmi lea dat áidna fágalaš ja rájáidrasttideaddji deaivvadansadji sámi kulturbargiide ja hutkás ealáhussii, ja lea danne dehálaš ja dárbbašlaš arena, dadjá sámediggeráđđi Maja Kristine Jåma (NSR).
Trall AS Oslos lea ožžon 150 000 ruvnno doarjjan ráhkadan lávlungirje-appa Trall sámegillii. Mihttu lea ráhkadit Trall dievaslaš sámi appan ja maid váldit mielde nuortalašgiela lassin davvi-, julev- ja lullisámegillii.
– Lea hui buorre ahte sámi lávlagat šaddet olámuddui, erenoamážit skuvllaide ja mánáidgárddiide, dadjá Jåma.
Tromsø Barnefestival AS lea ožžon 100 000 ruvnno doarjjan mánáidfestiválii Riedja Festivála 2023, mii lágiduvvui Romssas geassemánu 24. ja 25. beivviid. Festiválas lea fokus máŋggabealatvuhtii, sohkabealdássetvuhtii ja girjás kulturhápmái musihkain, lávdedáidagiin, filmmaid ja muitalančehppodagain, ja profiila lea ráhkaduvvon sihke sáme- ja dárogillii.
Vuođđudus Oslo World Music festival lea ožžon 100 000 ruvnno sámi ávvučájálmassii ja fágaprográmmii festivála áigge, mii lágiduvvo áigodagas golggotmánu 30. beaivvi rájes skábmamánu 5. beaivvi rádjai. Festivála čalmmustahttá iežas 30. jagi ja háliida boktit beroštumi, ealljárvuođa ja eanet máhtolašvuođa sámi musihkas, muhto maid čalmmustahttit politihkalaš áigebotta dás ja dál.
Digitála dáiddagaskkustanlávdi DAIDDA, mii lea Oslos, lea ožžon 100 000 ruvnno doarjjan sámi dáidaga ja dáiddáriid gaskkusteapmái digitála lávddis. DAIDDA AS jođiheaba guokte oappážaga geain leat ruohttasat sámi dáiddársogas. Mihttu lea ahte DAIDDA AS galgá šaddat njunuš aktevra Norggas digitála dáiddagaskkusteamis ja govvabuvttadeamis.
YOIK.UR AS lea ožžon 96 500 ruvnno doarjjan sámi juoigi Iŋgor Ántte Áilu Gaup/Áilloža mátkái Sveitsii dán geasi. Ovttas sveitsalaš Elisabeth Bergain áigu son promoteret sámi kultuvrra riikkaidgaskasaččat ja guorahallat vejolašvuođaid sámi artisttaide boahtteáiggis.
– Lea illudahtti oaidnit ahte min doarjjaortnet deaivá ja veahkeha dasa ahte šaddet máŋga gelddolaš ja ođasmahtti dáiddabuvttadeami ja dáiddavásáhusa miehtá Sámi, muhto maiddái riikkaidgaskasaččat, dadjá Jåma.
214 000 ruvnno addojuvvo ges doarjjan olu smávit kulturprošeavttaide.
Dás oainnát guđe kulturdoaimmat leat ožžon doarjaga dán vuoru: