– Sámediggeráđđi lea ilus go mii sáhttit doarjut prošeavttaid mat loktejit ovdan girjáivuođa sámi jienain mat guoskkahit, njuorasmahttet ja suodjalit. Dát čájeha ahte luohti ja sámi musihkka lea nanus - sihke árbevierus ja ođasmahttimis. Dat lea kultuvrralaš fápmu man mii galgat doarjut, dadjá sámediggeráđđi Maja Kristine Jåma (NSR).
DAT AS oažžu gitta 88 800 ruvnno doarjjan lullisámi artistta Cecilia Dyrøy, ByCecilia, popskearru almmuheapmái, ja dát lea su vuosttaš skearru maid almmuha. ByCecilia vuittii lávlunoasi Sámi Grand Prixas 2024:s. Prošeavttas ráhkadit popskearru lullisámegillii, dan botta go Cecilia dađistaga fas váldá ruovttoluotta gielastis. Skearrus galgá leat seaguhus lullisámi ja eŋgelasgielat teavsttain, ja dat almmuhuvvo čakčat.
Artista Vegard Bjørsmo oažžu maiddái doarjaga almmustahttit ieža vuosttaš skearru. Son oažžu gitta 191 500 ruvnno almmuhit EP Arvvis eai oidno gatnjalat. Mihttu lea báddet ja buvttadit vihtta lávlaga, maid almmuha EP-skearrun ovttas golmmain eará lávlagiin mat leat juo gárvásat. Bjørsmo lea ovdal searvan NRK Stjernekampii, ja lea maid dovddus neavttárin ja jietnaneavttárin, earret eará Disney-filmmas Jikŋon 2:s.
Rein Lyd AS oažžu gitta 200 000 ruvnno mearrasámi juoiganskearru almmustahttimii mas leat sihke boares ja ođđa luođit. Juoigi Markus Matell lea máŋga jagi čoaggán mearrasámi guovlluid dološ luđiid ja melodiijaid, muhtimat gitta 1800-logu rájes. Dološ luođit ovdanbuktojuvvojit musihkalaš hámis mii heive dálá áigái.
Gollebeaivi AS oažžu gitta 242 000 ruvnno almmuhit Elin Kåvena njealját soloskearru mas lea bargonamma Áibmu. Skearrus bohtet leat árbevirolaš luođit, iešráhkaduvvon lávlagat, luonddujienat ja erenoamážit ráhkaduvvon čuojanasat.
Johan Sara Jr oažžu gitta 224.250 ruvnno báddet ja almmuhit maŋimuš skearru trilogiijas gos son ohcá mearrasámi luođi álgoálgosaš vuoiŋŋa. Ovddit almmuhusat dán konseapttas leat Mearrasápmelaš ja Mearraspeajal. Trilogiija loahppaskearrus lea bargonamma Guollemáddu.
Dasa lassin oažžu Karlsen Kuturvirke gitta 75.500 ruvnno buvttadit ja almmuhit musihkkaskearru Emil Kárlseniin, ja Reckless AS oažžu gitta 59.306 ruvnno Arvvas-turneai.
Doarjagat addojuvvojit doarjjaortnegis Luohti ja sámi musihkka, mas lea rabas ohcanáigemearri skábmamánu 3. beaivvi rádjai 2025 dii. 15.30.
– Mun lean ilus go juoigan ja sámi musihkka lihkostuvvá ja go sihke nuorra ja sajáiduvvan sámi artisttain leat gelddolaš prošeavttat jođus. Mii illudit čuovvut artisttaid ja prošeavttaid viidáseappot, lohká Jåma.